Qalçenyuk polislərdən üzr istədi
Hokkeyçi Aleks Qalçenyuk öldürməklə hədələdiyi polislərdən üzr istəyib:
“Alkqoqol qəbul edəndən sonra yol verdiyim hərəkətlər məni olduğum kimi əks etdirmir. Ancaq mən məsuliyyəti öz üzərimə götürməliyəm. Ümid edirəm ki, bir gün ötən həftə üzləşdiyinizlə müqayisədə necə yaxşı adam olduğumu sizə göstərə biləcəm. Həyatınızı riskə atmaqla başqalarını qorumaq və onlara xidmət etmək üçün gördüyünüz işlər fədakarlıq və qəhrəmanlıqdan başqa bir şey deyil”.
"Football-plus.az" xəbər verir ki, Qalçenyuk üzrxahlıq məktubunda onu da bildirib ki, bir gün günahını yumaq üçün dayanmadan öz üzərində işləyəcək:
“Hər birinizi qiymətləndirir və hörmət edirəm. İstəyirəm ki, bunu biləsiz – hər gün öz üzərimdə işləyəcəm ki, günlərin birində günahımı yuyum və sizin əfvinizə ümid edim”.
Xatırladaq ki, hokkeyçi iyulun 9-da Arizona ştatında Skottsdeyl şəhərinin polisləri tərəfindən həbs olunmuşdu. 29 yaşlı amerikalı yol qəzasından sonra hadisə yerindən qaçmışdı. Onu həmçinin xuliqanlıqda, itaətsizlikdə, təhdid və qorxutma cəhdində günahlandırırlar. Şəhər həbsxanasına göndərilən Qalçenyuk ertəsi yaşayış yerini tərk etməməklə bağlı iltizam verib azadlığa çıxmışdı. Sonradan aydın oldu ki, Qalçenyuk saxlanılan zaman polisləri öldürməklə təhdid edib və onların ünvanına irqçi ifadələr qışqırıb.
“Arizona” iyulun 13-də Qalçenyukla bağladığı müqaviləni pozub. Halbuki hücumçu bu klubla iyulun ilk günündə anlaşmışdı. Qarşılıqlı razılığa əsasən onun MHL-dəki maaşı mövsüm üçün 775 min dollar olacaqdı. Qalçenyuk əvvəllər MHL-də “Monreal”, “Arizona”, “Pittsburq”, “Minnesota”, “Ottava”, “Toronto” və “Kolorado” komandalarında oynayıb, 654 oyunda 354 xal (146+208) toplayıb.
Digər xəbərlər
