Pyontek Türkiyədə oynayacaq
Əmrə Belözoğlunun başçılığı altında yeni mövsümə hazırlığı davam etdirən “İstanbul BŞ” son transferi ilə diqqəti çəkib.
"Football-plus.az" xəbər verir ki, rəhbərlik məhz bu məşqçinin istəyi ilə tanınmış polşalı forvard Kşiştof Pyonteki heyətə cəlb edib. Son dönəmlərdə bir qədər gözdən düşən və karyerası enişdə olan 28 yaşlı hücumçu ilə üçillik müqavilə imzalanıb. Pyontek üçün dünən klubun bazasında imza mərasimi təşkil olunub. O, jurnalistlərə açıqlamasında bunları deyib:
“Son mövsümlər mənim üçün çətin keçib. “Milan”dan sonra heç bir mövsümdə qol sayında ikirəqəmli həddə çata bilməmişəm. Amma futbolda hələ son sözümü deməmişəm. 28 yaşım var və ən yaxşı yaşımdayam. Daha öncə İtaliya və Almaniya çempionatlarında oynamışam. “Fənərbaxça”nın Cekonu aldığını, “Qalatasaray”ın İkardi ilə anlaşmaq üzrə olduğunu bilirəm. “İstanbul BŞ”nin də artıq Pyonteki var. Ümid edirəm ki, məşhur qol sevincimi bu mövsüm çox nümayiş etdirəcəm”.
Pyontek vətənində “Zaqlembe” və “Krakoviya”da adından söz etdirdikdən sonra “Cenoa”da sərgilədiyi məhsuldarlıqla Avropada populyarlıq qazanmışdı. 2018/19-da genuyalıların heyətində yarım mövsümə A seriyasında 13 qol vurduqdan sonra 35 milyon avroya böyük ümidlərlə “Milan”a transfer olundu. Amma zaman göstərdi ki, onun səviyyəsi “Milan”a uyğun gəlmir. İlyarımlıq “Milan” macərasından sonra bu futbolçu 2020-nin yanvarında 24 milyon avroya “Herta”ya keçdi. Amma burda da özünü göstərə bilməyincə “Fiorentina”ya, ötən mövsüm isə “Salernitana”ya icarəyə verildi. Polşa yığmasında 27 oyuna 11 qol vuran forvard 2022/23-ü “Salernitana”da 33 oyun, 4 qol, 5 məhsuldar ötürmə göstəricisi ilə tamamladı. Qısası, Türkiyə Pyontek üçün karyerasını yeni səviyyəyə qaldırmaq baxımından əla fürsətdi.
Digər xəbərlər
