“Jelezniçar”la səfər oyunundan 2:2-lik bərabərliklə Minskə yox, birbaşa Bakıya dönən “Dinamo”nun burda qələbə qazanıb “Neftçi”yə rəqib olmaqla bağlı planları suya düşdü. Buna İlahi Ədalətin təntənəsi də demək olar, “Neftçi”nin adı, imici ilə bağlı arzuolunmaz söz-söhbətdən qurtulması da!

Açığı, şəxsən mən dünya idmanında heç kimin görmək istəmədiyi, hər imkanda qapı arxasında qoyulan, Ukrayna torpaqlarının işğalı planlarında “siam əkizləri” kimi birgə hərəkət edən Rusiya ilə Belarusa bu şəkildə qucaq açmağımızın səbəbini, mahiyyətini, məzmununu, bizi buna sövq edən şəraiti anlamıram və anlamaq da istəmirəm. Olduqca yanlış və təhlükəli yolla irəliləyirik, Allah axırımızı xeyir etsin. Əlbəttə, bununla bağlı müəyyən mülahizələrim var, amma söhbət idmanla bağlı nəsə oxumaq istəyən adamı fərqli istiqamətlərə yönəldəcək deyə, bildiklərim özümə qalsın.

Hə, “Dinamo” “Jelezniçar” səddini keçib, “Neftçi”yə rəqib olsaydı, ardından mübarizəni dayandırsaydı, necə tozanaq qopacağını təsəvvür edirsiz də?! “Neftçi”nin Azərbaycan futbol tarixində ilk dəfə qrupa düşdüyü 2012-nin avqustunda qalxan tozanaqdan... “Ağ-qaralar”ın onda qrupa pul gücünə düşdüyünü iddia edənlər bu dəfə də deyəcəkdilər ki, “Dinamo”nu gətirib bir həftə öz bazalarında saxladılar, yedirib-içirdilər ki, sonra da Belarusa məğlub yola salsınlar. Bax, məhz buna görə mən dünən “Dinamo”ya yox, “Jelezniçar”a azarkeşlik edirdim, Krpiç 78-ci dəqiqədə qələbə topunu vuranda özümdən necə getmişəmsə, evdəkilər başıma bir vedrə su töküb ayıldıblar. Zarafat bir yana, “Neftçi” böyük söz-söhbət, şəbədə, məsxərə dalğasından, qalmaqaldan qurtuldu. İndi bakılırın üzərinə düşən vəzifə aydındı: qolunun gücünə “Jelezniçar”ı keçib, Konfrans Liqasında 3-cü mərhələdə oynamaq. “Jelezniçar” “Neftçi”dən güclü deyil, əksinə, zəifdi. Bunu yəqin Mutu da gördü!

ORXAN