Üç gün öncə “Neftçi” Voislav Stankoviçlə müqaviləni yeniləmədiyi ilə bağlı rəsmi paylaşım etdi.

Elə həmin gün serbiyalı futbolçu ölkəsinin “Jelezniçar” klubuna keçdi. Bununla bağlı Pançevo təmsilçisinin rəsmi saytı məlumat yaydı.

Sən demə, 35 yaşlı müdafiəçi flaqmandan küsüb. O, bu barədə ölkə mətbuatında açıqlamasında bildirib. Stankoviç deyib ki, “Neftçi” mənimlə normal şəkildə yolları ayırmadı.

Bu məsələ ilə bağlı “Football-plus.az”a maraqlı informasiya daxil olub. “Neftçi” rəhbərliyi Stankoviçdən yeni baş məşqçinin təyinatına kimi gözləməsini istəyib. Çünki onunla bağlı son qərarı məhz çalışdırıcı verməliymiş. Lakin əvvəlcə bu təkliflə razılaşan Stankoviç sonradan fikrindən dönüb. 35 yaşlı müdafiəçi “Neftçi” rəhbərliyinə xəbərdarlıq etmədən yeni klubu ilə danışıqlara başlayıb. Yekunda da “Jelezniçar”a keçib.

İndi belə məqamda serbiyalı futbolçunun inciməyə haqqı var? Düzdü, 2019-cu ildən “Neftçi”də çıxış edən müdafiəçi, ola bilər ki, rəhbərliyin ona jeşt edəcəyini gözləyib. Amma heyətdə dəyişikliklərin gözlənildiyi flaqmanda heç kim bu riskə getməzdi. Stankoviç səbrli olub gözləsəydi, hansısa addımın atılmaq ehtimalı ola bilərdi. Lakin müdafiəçi gözləməyib, daha sərfəli təklifi seçibsə, nə üçün flaqmandan inciyir? Bu, düşündürücü sualdı.

İLKİN SULTANLI