“Bildiyiniz kimi, UEFA-nın qərarı ilə Belarus klubları avrokubok görüşlərini neytral meydanda keçirməlidi. Onlar üçün Azərbaycan variantı da var idi. Mən təkcə “Dinamo” (Minsk) yox, BATE və “Neman” üçün də başqa variantlar təklif etmişdim. Nəzərinizə çatdırım ki, Belarus Futbol Federasiyası klublarının oyunlarının Azərbaycanda keçirilməsi üçün AFFA-ya müraciət etmişdi. Yəni, oyunla bağlı həm federasiyamız, həm də klub öz dəstəyini göstərir. Lakin bütün təşkilatçılıq bizim şirkətin üzərindədi. Qarşılaşma ilə bağlı hər şeyi biz həyata keçirməyə çalışacağıq. Bilirsiz ki, bir görüşün keçirilməsi göründüyü qədər asan deyil. Azərbaycanda elə bilirlər ki, cəmi 11 nəfərlik 2 komanda meydana çıxır. Halbuki bu işlər əziyyət tələb edir. UEFA oyun məsələlərində çox həssasdı”.

"İcarə haqqı çox da yüksək deyil. Bu əslində “Azərsun Arena” üçün ilk belə təcrübə olacaq. Çalışacağıq ki, komanda şəklində onlara dəstək olaq. Ümid edirik ki, hər şey lazımi səviyyədə olar”.

“Fanatlarla bağlı “Dinamo”nun maraqlı tələbi oldu. Bizə dedilər ki, hər iki tərəf üçün cəmi 20 nəfər yetərlidi. Başa düşmədim ki, bunu necə tənzimləyəcəklər. Yəqin ki, oyunu izləmək istəyən azərbaycanlılar da olacaq. Bilirsiz ki, “Dinamo” mərhələni keçsə, “Neftçi”ylə qarşılaşa bilər. Biz də “ağ-qaralar”la əlaqədəyik. Belarus təmsilçisi turu keçsə, Bakıda qalacaq. 2-ci təsnifat mərhələsinin hər iki görüşü də Bakıda keçiriləcək. Bu məsələ ilə bağlı da işlər görəcəyik”.