“PARI Premyer” kuboku başa çatdı. Serbiya təmsilçisi “Srvena Zvezda” turnirin qalibi oldu. “Neftçi”nin bu yarışda necə çıxış etdiyi hamıya bəllidi. Flaqman üç görüşün hamısında uduzmaqla sonuncu yeri tutdu.

“Neftçi”nin çıxışı ilə bağlı bütün detalları “Futbol+” səhifələrində nəzərinizə çatdırmışıq. Amma 3 həftə ərzində diqqətimizi çəkən bir məqam oldu. Qarşılaşmalar Azərbaycanda canlı yayınlanmadı. Ölkəmizdə iki idman telekanalı fəalliyyət göstərir. Lakin onlardan heç biri turniri yayınlamağı lazım bilmədi. Düzdü, “CBC Sport” buna cəhd göstərib. Amma “Matç TV”ni razı sala bilməyib. Yəqin ki, maliyyə şərtlərində razılaşma olmayıb. Kanalın şərhçilər qrupunun rəhbəri Rüstəm Əfsərli bununla bağlı “sport24.az”a açıqlama verib. Həmkarımızın fikirlərini diqqətinizə çatdırırıq:

“Matç TV” yayını heç kimə vermədi? Bəs necə oldu ki, “Fənərbaxça”nın bütün görüşləri “S Sport Plus” kanalı vasitəsi ilə bütün Türkiyədə nümayiş olundu? Hətta “Srvena Zvezda”nın rəsmi “yutub” kanalı belə öz qarşılaşmalarını izləyicilərinə təqdim etdi. Niyə biz məcbur olduq ki, ölkənin ən köklü klubunun oyunlarına Rusiya, Türkiyə, Serbiya kanallarında baxaq? Axı ölkəmizdə iki idman telekanalı fəalliyyət göstərir. Niyə ucqar rayonda “Neftçi”yə azarkeşlik edən Məmməd dayı qohum-qonşusundan xahiş etməlidi ki, başına dönüm, mənə flaqmanımızın oyununun internetdən linkini tap. Bunları qoyaq bir kənara, nə üçün oyuna rus, serb dilində baxmalıyam? Mənim dilim bütün dillərdən gözəl və anlaşılandı. Niyə qonşu ölkələrin şərhçilərinin “Neftçi”yə “Bakı” deməsini, futbolçularımızın adını əcaib şəkildə səsləndirməsini eşitməliyəm? Azərbaycan kimi idmanı inkişaf edən ölkənin 2 kanalının pulu olmadı ki, “PARI Premyer” kubokunu yayınlasın?

“İdman TV”nin onsuz da son illərdə fəaliyyəti göz önündədi. Yəni heç nə etmirlər. Başları qarışıqdı. “CBC Sport”da isə işlər qaydasındadı. Amma onlar da ictimaiyyəti aldadıb. “Turnirin yayınını ruslar heç kimə vermədi” demək nədi? Niyə açıq söyləmirsiz ki, ruslara istədiyi pulu vermək istəmədik. İnsanları aldatmağa nə ehtiyac var idi?

Hər iki kanalımız xırda yarışlarla bağlı bir-biri ilə ciddi rəqabətə girib. Hansısa lazımsız turniri yayınlayarkən şərhçiləri ağızdolusu “ölkə tarixində ilk dəfə bu yarış bizim kanalımız vasitəsi ilə canlı yayınlanır”, - deyə aləmə car çəkir. Olmazdı ki, “PARI Premyer” kuboku ölkə tarixində ilk dəfə ya “CBC Sport”, ya da “İdman TV” vasitəsiylə canlı yayınlanardı? Axı Azərbaycan klubu ilk dəfə bu turnirdə iştirak edirdi...

İLKİN SULTANLI