“Turan Tovuz”un futbolçusunu Türkiyədə aldadıblar
Budaq Nəsirov uzun zamandan sonra “Turan Tovuz”la 3 illik müqavilə bağlayaraq böyük futbola qayıtdı.
Futbolçunun mövzu ilə bağlı təəssüratı və məqsədləri haqda ötən saylarımızdan birində məlumat vermişdik. O, qəzetimizə açıqlamasında özünü xoşbəxt hiss etdiyini və hədəflərinin böyük olduğunu demişdi.
İyulun 12-də “Turan Tovuz”la “Araz Naxçıvan” Bakı Olimpiya Stadionunun (BOS) ehtiyat meydanında yoxlama görüşü keçirdi (5:1). Son dəfə Lissabon “Sportinq”ində oynamış Budaq Nəsirov yeni komandasının heyətində meydana çıxdı. Baş məşqçi Ayxan Abbasov mərkəz yarımmüdafiəçisinə matçın ikinci hissəsində şans verdi. Amma futbolçu 10 dəqiqə sonra baxışda olan komanda yoldaşı, afrikalı Bosco ilə toqquşaraq yerdə qaldı. Dərhal müdaxilə edən həkimlər 5 dəqiqə sonra Budağın başını sarıyaraq meydandan çıxardılar. Onu əvəzedici komandanın üzvü Altayturan Bektaşoğlu əvəz etdi.
“Turan Tovuz” növbəti mövsümün hazırlıq planları çərçivəsində təlim-məşq toplanışı keçirmək üçün Türkiyəyə yollanıb. Əldə etdiyimiz məlumata görə, Budaq Nəsirov komandaya qoşula bilməyib. Görəsən, futbolçunun durumu qısa müddətdə düzəlməyəcək qədər ciddidi? Bu sualı futbolçuya ünvanladıq. O, sağlamlıq durumunu bizlə paylaşdı:
“Tovuzdayam. Zədəmin 3-4 gün ərzində tam sağalacağını düşünürəm. O qədər də ciddi deyil. Deməli, sol gözüm şişib. Bu üzdən görmə qabiliyyətim məhdudlaşıb. Sağ olsunlar, həkimlər vaxtında müdaxilə etdilər. Bəlkə daha pis hadisə baş verə bilərdi. Çünki toqquşmadan sonra heç nəyin fərqində deyildim. Hətta təkidlə istəyirdim ki, oyuna davam edim. Tibb işçiləri qanaxma olduğunu dedi. Sinirlərim uyuşduğuna görə heç bir ağrı hiss etmirdim. Bir müddət sonra özümü həqiqətən pis hiss etməyə başladım. Şükür Allaha, indi yaxşıyam. Sadəcə, zaman lazımdı ki, çapıqlar tam birləşsin və ağrılar bitsin. Hazırda istirahət edirəm. Həkimlərdən ev şəraitində məşq edə bilib-bilməyəcəyimi soruşdum. İcazə vermədilər. Çünki çox hərəkət etmək yenidən qanaxmaya səbəb ola bilər. Müalicəm davam edir. Böyüdüləcək bir şey yoxdu”.
Futbolçu 3-4 gün sonra oynaya biləcəksə, Türkiyə toplanışına aparılmamasının səbəbi maraqlıdı. “Turan Tovuz”u qardaş ölkədə növbəti mövsümə hazırlıq baxımından vacib matçlar gözləyir. Belə olan halda Ayxan Abbasov Budaq Nəsirovun xidmətində maraqlı olmalıydı. Görəsən, buna nə mane olub? Futbolçu çoxlarının agah olmadığı detallardan söz açdı:
“Mən 6 ay öncə Türkiyədən ikiilliyə deportasiya edilmişəm. Bu üzdən komanda ilə səfərə gedə bilmədim. Deməli, 2 il öncə Türkiyədə bir oteldə məskunlaşmışdım. Bilirsiz ki, orda 3 ay əlavə sənəd lazım olmadan qalmaq mümkündü. Həmin vaxt bitəndən sonra oturum izni almalısan. Oteldə çalışan azərbaycanlı türk dostunun bu işdə mənə kömək edə biləcəyini dedi. Mən də lazım olan vəsaiti ödədim. Bir neçə gün sonra Türkiyədə qalmağa davam edə biləcəyimi dedilər və bunu təsdiq edən sənədi verdilər. 1 il 4 ay orda yaşadım. Azərbaycana qayıtmaq vaxtı çatanda hava limanına yollandım. Orda sənədlərim yoxlanmalı və ölkədən çıxdığım təsdiqlənməli idi. Polislər yoxlayarkən bəlli oldu ki, mənə verilən kağızlar dövlət portalında rəsmiləşməyib. Bundan sonra məni Türkiyədən çıxardılar və 2 il müddətinə girişimə qadağa qoydular. Klub qərarın ləğvi üçün səfirliyə müraciət edib. Hazırda qurumun qərarını gözləyirik. Qadağa götürülməsə, “Turan Tovuz”un əvəzedici komandası ilə birlikdə məşqlərə başlayacam. Məqsədimizə nail olsaq, Türkiyə toplanışının son bir günü qalsa belə, heyətə qoşulacam. Çünki son gündə də yoxlama görüşü var. Heç olmasa, həmin matçda iştirak etmək istəyirəm”.
Yarımmüdafiəçidən onun üçün düşərli olmayan “Turan Tovuz” – “Araz Naxçıvan” görüşü haqda fikirlərini də soruşduq:
“Yeni komandamda hər şeyin qaydasında olduğunu demişdim. Oyundan sonra da həmin fikirdəyəm. Amma demək olar ki, premyer-liqa təcrübəsi olmayan, heyəti formalaşdırma prosesini tamamlamayan komandaya qalib gəlmək o qədər də çətin deyil. Əsas gücümüz Türkiyə klubları ilə yoxlama görüşündə bilinməlidi. Daha sonra premyer-liqada əldə etmək istədiyimiz nəticələrə köklənməliyik. “Turan Tovuz”u gələn il bu ərəfələrdə avrokubok oyunlarında görmək istəyirik. Bu bütün tovuzluların arzusudu”.
Budağın problemi haqda “Turan Tovuz”a da müraciət etdik. Klubun mətbuat xidmətinin rəhbəri Süleyman Tağıyev mövzu ilə bağlı aidiyyatı qurumlara müraciət edildiyini təsdiqlədi. Tezliklə problemin aradan qaldırılması təmin olunacaq.
KƏNAN BAHADIR
Digər xəbərlər
