Həftəsonu keçirilən Böyük Britaniya “Qran-pri”sinin yekunları haqda ötən sayımızda bilgi vermişdik.

“Football-plus.az” xəbər verir ki, Silverstoun trassında finişə 2-ci çatan “Maklaren” pilotu Lando Norris karyerasındakı ən yaxşı nəticəni təkrarladı, amma bunu ilk dəfə ev trassında bacardı...

- Lando, “Formula-1”də yeddi dəfə fəxri kürsüyə qalxmısız. Sonuncunu necə qiymətləndirirsiz?
- Bu podium ən yaxşılardandı, deyərdim ki, ən yaxşıdı! İlk podium əbədi yadda qalır. Silverstounda – ev mərhələsində ilk dəfə fəxri kürsüyə qalxdım, bu da xüsusi hadisədi. Hər kəsin adımı səsləndirməsini, azarkeşləri, komandanı fəxri kürsünün altında görmək xoşdu. 2007-08-ci illərdə - Hemilton və Alonso Silverstounda fəxri kürsüyə qalxanda bunu görmüşdüm. İndi mənim növbəmdi və bununla qürur duyuram.

- Böyük Britaniya mərhələsinin ilk dövrələrində lider olanda nə hiss edirdiz?
- Ürəyim həmişəkindən tez-tez döyünürdü, bir neçə dəfə tribunalara, azarkeşlərə baxdım. Qeyri-adi hal idi. Komanda işinin öhdəsindən yaxşı gəldi, maşını yaxşılaşdırdı. Son bir neçə həftədə rəqabətədavamlıyıq, odu ki, çox sevinirəm. Yaxşı start məni xaosdan xilas etdi – 3-cü və 4-cü döngələrdə nələrin olacağını heç vaxt bilmirsən. İlk dövrələrdə bir qədər uzaqlaşa bildim, ancaq izləyicilərimlə fərq istədiyim qədər deyildi.

- Son bölümdə “Hard” təkərləri ilə sürməli olduğunuza görə narazı qaldız. İndi bu qərarı doğru sayırsızmı?
- Demək çətindi. Mən “Soft”a üstünlük verərdim. Bəlkə də belə təkərlə təhlükəsizlik avtomobili gedəndən sonra ilk üç dövrədə daha az stress yaşayardım. Ancaq yeni "Soft" komplektim yox idi.

- Bizə yarışın sonunda Hemiltonla aranızdakı mübarizədən danışın...
- Möhtəşəm idi. 2-ci pilləni qorumağı çox istəyirdim, bacardığımı etdim, restart ərəfəsində təkərləri yaxşı qızdırmaq vacib idi. Lüis məni ötə bilərdi, ancaq sürətli döngələrdə cəld tərpəndim. Mübarizəmizin azarkeşlərin xoşuna gəldiyinə əminəm.

- Yarış vaxtı “Hard” təkərlərindən istifadə etmək istəmədiz, ancaq startda “Medium” təkərləri çox yaxşı idi. Belə görünür ki, bütün həftəsonu təkərlərlə yaxşı işləmisiz. Bu keyfiyyət son yenilənmələrin ardından peyda oldu, yoxsa əvvəldən var idi?
- Mövsümün gedişində bizdə belə şey yox idi. Bəhreyndə hər şey əksinə idi. İndi yüksək sürətdə hədsiz rəqabətədavamlıyıq. Demək olar ki, “Red Bull” ilə eyni səviyyəyə gəlib çatmışıq.