Atilla Salaini əldən vermək üzrə olan ''Fənərbaxça'' müdafiəni gücləndirib.

"Football-plus.az" xəbər verir ki, İstanbul nəhəngi ''Strasbur''dan fransaəsilli qanalı müdafiəçi Aleksander Djiku ilə ''3+1'' illik müqavilə imzalayıb. Türkiyə mətbuatının yazdığına inansaq, azad oyunçu statusunda transfer edilən 28 yaşlı futbolçunun illik maaşı 1,7 milyon avro təşkil edəcək. Ona əlavə olaraq 1,5 milyon avro imza parası ödəniləcək. Djiku hazırda Rusiyada olan komandanın düşərgəsinə qoşulacaq. Təcrübəli müdafiəçi buna qədər ''Bastiya'' və ''Kan''ın şərəfini qoruyub. ''Strasbur'' onu 2019-da 4,5 milyon avroya transfer etmişdi. Müdafiənin mərkəzində çıxış edən Djiku indiyə qədər Qana yığmasında 19 oyun keçirib və 1 qol vurub. 2022-də Djiku ilin ən yaxşı qanalı futbolçusu seçilmişdi! O, karyerası ərzində 215 oyunda 5 qol vurub. Salaiyə gəlincə, Macarıstan yığmasının üzvü Almaniya təmsilçisi ''Union''a transfer olunmağın bir addımlığındadı. Tarixində ilk dəfə Çempionlar Liqasının qrup mərhələsində oynamağa haqq qazanan Berlin təmsilçisi 25 yaşlı oyunçuya görə 14 milyon avro ödəməyə hazırdı.

Xatırladaq ki, ''Fənərbaxça'' Salaini 2021-in yanvarında 2,2 milyon avroya heyətinə qatmışdı.

ƏLİ