“Yuventus” rəhbərliyində növbəti təyinat rəsmiləşib. İtaliya klubunun yeni idman direktoru müəyyənləşib.

"Football-plus.az" xəbər verir ki, bu vəzifəyə Kriştiano Cuntoli təyin edilib. O, Fabio Paratiçini əvəzləyib. Cuntoli 2015-ci ildən “Napoli”nin idman direktoru idi. Bu klubun son illərdəki transfer əməliyyatlarında uğurlu seçimi böyük ölçüdə onun fəaliyyətinin nəticəsi sayılır.

“Yuventus”la bağlı yayılan digər xəbər daha cəlbedicidi. UEFA maliyyə pozuntularına görə klubun avrokubokların cari mövsümündə iştirakına qadağa qoyacaq. “Corriere dello Sport” qəzetinin yaydığı xəbərdə turinlilərin yeni mövsüm üçün vəsiqə qazandığı Konfrans Liqasından kənarlaşdırılacağı bildirilib. Komandanı bu turnirdə ötən mövsüm A seriyasını 8-ci yerdə başa vuran “Fiorentina”nın əvəzləyəcəyi də qeyd edilib. İdman nəşrinin yazdığına görə, “Yuventus” 2024/25 mövsümü üçün də eyni cəza ilə üzləşmək riskinin olmaması üçün UEFA-nın qərarı ilə razılaşacaq və İdman Arbitraj Məhkəməsinə şikayət etməyəcək. UEFA isə lisenziyalaşdırma və “maliyyə feyr-pleyi” qaydalarının potensial pozuntuları ilə bağlı işi bağlayacaq və Turin klubu bu məsələ ilə bağlı növbəti araşdırmanın obyektinə çevrilməyəcək.

Qeyd edək ki, ötən mövsüm maliyyə qaydalarını pozduğu üçün 10 xaldan məhrum edilən “Yuventus” A seriyasını 7-ci yerdə başa vurub. Bu cəza olmasaydı, komanda Çempionlar Liqasına vəsiqə verən 4-cü yeri tutacaqdı.