Sabiq rəhbərliyin maliyyə fırıldaqlarına görə A seriyasında 15 xaldan məhrum olan “Yuventus” növbəti cəza ilə üzləşə bilər. Bu xəbəri “Corriere dello Sport” yayıb.

Məlumatda İtaliya Futbol Federasiyasının (İFF) klubun maliyyə əməliyyatları ilə bağlı araşdırmanı davam etdirdiyi bildirilir. İFF-nin baş prokuroru futbolçuların maaşları ilə bağlı saxtakarlığa görə “Yuventus”un hesabından ən azı 20 xal silinməsini istəyir. Bu isə səbəbsiz deyil. Rəhbərlik 2020-ci ildə başlayan koronavirus pandemiyası zamanı kluba kömək etmək üçün futbolçularla dörd aylıq maaşlarından imtina ilə razılıq əldə edildiyini bəyan etmişdi. Ancaq araşdırmalar nəticəsində komanda üzvlərinə yalnız bir ay maaş ödənilmədiyi müəyyənləşib. Digər 3 ayın pulları isə mükafat, bonus və başqa müxtəlif formalarda sahiblərinə çatıb. Yəni futbolçuların maaşı gizli şəkildə ödənilib.

Xatırladaq ki, bundan əvvəl maliyyə qaydalarının pozulmasına görə 15 xalının silinməsi komandanın 3-cü yerdən 10-cuya düşməsinə səbəb olmuşdu. “Yuventus” hazırda 20 oyuna 23 xalla 13-cü yerdədi. İFF-nin növbəti sanksiyası yanvarın 29-da rəsmiləşə bilərdi. Lakin ortaya yeni faktlar çıxdığı üçün qəraın verilmə müddəti 40 günlüyə təxirə salınıb. Başqa sözlə, klubun aqibəti martda bilinəcək