Rusiyada keçirilən və yeni mövsümə hazırlıq statusu daşıyan “PARI Premyer” kuboku davam edir.

"Football-plus.az" xəbər verir ki, şənbə günü Rusiyaya yollanan (və buna görə Kiyev “Dinamo”su, Ukrayna Futbol Assosiasiyası tərəfindən sərt şəkildə tənqid olunan) “Fənərbaxça” bazar günü turnirdə ilk oyununu keçirib.

İstanbul nəhəngi son illərdə Rusiya futbolunda aşkar dominantlıq edən “Zenit”lə qarşılaşıb. Sankt-Peterburq klubu buna qədər bu turnirdə təmsilçimiz “Neftçi”ni (3:1) üstələmiş, Serbiya çempionu “Srvena Zvezda”ya isə (1:2) uduzmuşdu. Oyun həm də İsmayıl Kartalın 3-cü dönəminin debüt matçı olduğuna görə maraq doğururdu. Amma “Fənər” meydana heç də ideal heyətlə çıxmadı.

Yeni transferlərdən Kent ilk dəqiqələrdən şans qazandığı halda Ceko, ümumiyyətlə, meydana çıxmadı. “Qazprom Arena”da keçirilən matçın ilk yarısını meydan sahiblərinin, ikinci hissəsini qonaqların hesabına yazmaq olar. “Fənər”in heyətində qapıçı İrfan Can Eğribayatla dayaq yarımmüdafiəçisi İsmayıl Yüksək özünü yaxşı tərəfdən göstərməyi bacardı. Sona qədər də oyunda qol olmayınca turnirin reqlamentinə əsasən tərəflər birbaşa penaltilər seriyasına keçdi. “Fənər”in heyətində Rossi və İrfan Can Kahveci penaltiləri qola çevirə bilmədi və “Zenit” 4:3 hesabı ilə üstün oldu. “Sarı-lacivərdlilər” turnirdə növbəti oyunu sabah “Srvena Zvezda”ya qarşı keçirəcəklər.

İyulun 4-dən etibarən Sloveniyada toplanış keçən “Trabzonspor” üçün ilk hazırlıq oyunu uğursuz alınıb. Yeni mövsümə Nenad Byelitsanın başçılığı altında hazırlaşan qaradənizlilər Lyublyanada Xorvatiya təmsilçisi “Hayduk”a boyun əyiblər. Xdorvatlar hər iki qolu ilk yarıda vurub. Məğlubiyyət azmış kimi, Trabzon təmsilçisi yeni transfer Xoakin Fernandesi də itirib. İspaniyalı mərkəz müdafiəçisi görüşün əvvəllərində zədələnərək əvəzlənib. O, təxminən 10 gün məşqlərdə iştirak etməyəcək. “Trabzonspor” ikinci oyununu iyulun 15-də Macarıstan təmsilçisi “Fehervar”a qarşı keçirəcək.

Daha bir maraqlı oyun Bursada keçirilib. Bir neçə gün öncə Kocaelidə “Qalatasaray”ı məğlub edən “Hall Siti” bu dəfə “Hatayspor”la qarşılaşıb. Bu, “Hatayspor”un təxminən 5 aylıq fasilədən sonra keçirdiyi ilk oyun oldu. Xatırladaq ki, Volkan Dəmirəlin çalışdırdığı bu kollektiv fevralın 5-də Türkiyədə baş vermiş dəhşətli zəlzələdən sonra superliqada çıxışını dayandırmışdı. Komanda artıq bəzi transferlər həyata keçirib və gələn mövsüm yenə elitada oynayacaq.

Zəlzələdə dünyasını dəyişmiş Kristian Atsu unudulmadı. Onun forması oyundan öncə alqışlar altında meydanın mərkəzinə qoyuldu. Acun Ilıcalının sahibi olduğu çempionşip təmsilçisi “Hall Siti” 68-ci dəqiqədə hesabı açsa da, qələbəni qoruya bilmədi. “Hatayspor”a bu yay Almaniyadan gəlmiş 19 yaşlı qürbətçi forvard Ünal Durmuşhan komandanı məğlubiyyətdən xilas etdi. Patrik Klyuvertin başılığı altında tarixində ilk dəfə avrokuboklarda oynamağa hazırlaşan “Adana Dəmirspor” isə Moldovanın aşağı liqa təmsilçisini asanlıqla darmadağın edib.

Zenit (Rusiya) – Fənərbaxça 0:0, p. - 4:3
Fənərbaxça: İrfan Can Eğribayat, Sanqare (Osayi-Samuel, 71), Sərdar Əziz (Yiğit Efe Dəmir, 89), Qustavo Enrike (Salai, 72), Oostervolde (Peres, 77), Arao (İrfan Can Kahveci, 62), İsmayıl Yüksək, Mərt Hakan Yandaş (Krespo, 63), Burak Kapacak (Rossi, 63), Kent (Əmrə Dəmir, 83), Sərdar Dursun (Pedro, 71).

Trabzonspor – Hayduk (Xorvatiya) 0:2
Dolçek, 14. Melnyak, 33.
Trabzonspor: Taha Tepe, Sərkan Asan (Əli Şahin Yılmaz, 74), Hüseyin Türkmən (Kərəm Şən, 61), Fernandes (Densvil, 19), Arif Boşluk, Doğucan Haspolat (Salih (Malkoçoğlu, 74), Abdulkadir Ömür (Bartra, 61), Visça (Poyraz Yıldırım, 74), Əmirhan Zaman (Dorukhan Toköz, 74), Orşiç (Əbdürrəhman Bayram, 74), Qomes (Enis Destan, 46).

Hatayspor – Hall Siti (İngiltərə) 1:1
Ünal Drumuşhan, 84 – Jarvis, 68.
Adana Dəmirspor – Sukleya (Moldova) 5:0
P.N`Diaye, 5. Belhanda, 27. Ş.Ndiaye, 34. Qulbrandsen, 50. Əmrə Akbaba, 75.