21 yaşadək futbolçulardan ibarət millilərin Avropa çempionatı sona yaxınlaşır. Gürcüstan və Rumıniyada keçirilən turnirin finalçıları artıq bəllidi. Həlledici görüşdə İngiltərə ilə İspaniya üz-üzə gələcək. Turnir bizim üçün də maraqlı idi. Çünki FİFA referisi Əliyar Ağayev və komandası – Zeynal Zeynalovla Akif Əmrəli oyunları idarə edirdi.

Redaksiyamıza azərbaycanlı hakimlərlə bağlı maraqlı məlumat daxil olub. Əldə etdiyimiz bilgiyə görə, Əliyar Ağayev, Akif Əmrəli və Zeynal Zeynalov artıq Bakıdadı. Onlar üçün turnir başa çatıb. Məlumatı dəqiqləşdirmək üçün AFFA-nın Hakimlər Komitəsi ilə əlaqə saxladıq. Qurum informasiyanın doğruluğunu təsdiqlədi.

Qeyd edək ki, Əliyar Ağayev Avropa çempionatında A qrupunun açılış matçını - Belçika - Niderland (0:0) oyununu idarə edib, C qrupunun 2-ci turunda isə Çexiya - Almaniya görüşündə (2:1) 4-cü hakim olub. Bundan əlavə, FİFA referimiz C qrupunun 3-cü turu çərçivəsində "Batumi Arena"da keçirilən İngiltərə - Almaniya qarşılaşmasında ədaləti qoruyub.

İLKİN SULTANLI