Gürcüstanla Rumıniyanın şərikli qəbul etdiyi futbol üzrə U-21-lər arasında Avropa çempionatının final mərhələsi həlledici mərhələyə qədəm qoyub. Dünən keçirilən ilk iki 1/4 final oyununda İspaniya İsveçrəni (2:1, əlavə vaxtda), İsrail Gürcüstanı (4:3, penalti seriyasında) məğlub edib. Bu gün isə İngiltərə ilə Portuqaliya, Fransa ilə Ukrayna qarşılaşacaq.

Xəbər verdiyimiz kimi, çempionatın ilk günündə - iyunun 21-də keçirilən Belçika – Niderland oyununu Əliyar Ağayev idarə etmişdi. Həmyerlimiz bir də iyunun 25-də C qrupu çərçivəsində keçirilən Çexiya – Almaniya oyununda 4-cü hakim kimi etimad qazanıb. Bundan əlavə, ayın 28-də C qrupunun İngiltərə - Almaniya matçını idarə edib. Həmin gündən bəri Əliyardan səs-soraq yoxdu. Dünənki və bugünkü oyunlara təyinat almadığını nəzərə alsaq, belə çıxır ki, Azərbaycandan olan hakimlər briqadası üçün turnir bitib. Yalnız iki qrup oyununa çıxan referiyə UEFA yarımfinal və final oyunlarını etibar etməz!

ORXAN