İyulun 2-si bütün dünyada Beynəlxalq İdman Jurnalistləri Günü kimi qeyd olunur.

Azərbaycanda da aparıcı idman qurumları, futbol klubları həmin günə biganə qalmadı, jurnalistləri peşə bayramı münasibəti ilə təbrik etdi, uğurlar arzuladı. Maraqlıdı ki, iyulun 2-si ölkəmizdə həm də Polis Günü kimi qeyd olunur, yəni Azərbaycan polisi 105 yaşını tamamladı. Polisləri və jurnalistləri təbrik edənlər arasında “Qarabağ” futbol klubu da var idi.

“Football-plus.az” xəbər verir ki, çempion klubun hər iki peşənin sahiblərinə ayrı-ayrılıqda ünvanladığı təbrik çox maraqlı mənzərəni üzə çıxarıb. İdman jurnalistlərinə ünvanlanan təbrikə 254 şəxs reaksiya verib, 239-u “bəyənmə”, 13-ü “ürək”, 1-i “yanındayam”, daha biri “gülüş” işarəsi qoyub.

Polislə bağlı təbrikə 458 internet istifadəçisi biganə qalmayıb. 389 adam bu paylaşımı bəyənibsə, 61-i “gülüş”, 5-i “qəzəb”, 3-ü “ürək” işarəsindən yararlanıb. Deməli, belə çıxır ki, bu ölkədə polis idman jurnalistindən çox sevilir.

Üzülək, yoxsa üzülməyək?!