İki gün öncə Emin Mahmudovun "Neftçi" ilə rəsmən müqaviləsinin müddəti başa çatdı.

"Football-plus.az" xəbər verir ki, yığmanın üzvü hazırda azad agentdi. Onunla bağlı hazırda mediada bir çox söz-söhbətlər gəzir. Konkret deyə bilərik ki, Emin "Neftçi" ilə yeni müqavilə imzalamayıb. Düzdü, kapitana 3 illik saziş təklif olunub. O, bunu qəbul etsə, ilinə 400 min dollar qazanacaq. Lakin Emin bu təklifə cavab verməyib. Bəs kapitan nəyi gözləyir? Emin niyə gözləmə mövqeyindədi? Məsələ ilə bağlı redaksiyamıza maraqlı məlumat daxil olub. Mahmudovu hələ 1 il öncə Suədiyyə Ərəbistanı klublarından biri transfer etmək istəyib. Futbolçuya illik 1 milyon dollarlıq maaş təklif olunub. Lakin həmin klub Emin üçün transfer haqqı ödəmək istəməyib.

İkinci məqam isə Mahmudovun tanınmış ukraynalı menecer Vadim Şabli ilə əməkdaşlığa başlamasıdı. Adı çəkilən agent daha çox Avropa və ərəb ölkələrinin klublarına futbolçular verir. Məhz həmin şəxsin sayəsində Emin rahat şəkildə Suədiyyə Ərəbistanı liqasında çıxış edən kollektivlərin birinə keçə bilər.

İLKİN SULTANLI