Tarixinin ən yaxşı mövsümünü keçirərək 4-cü pilləni tutan və Konfrans Liqasının 2-ci təsnifat mərhələsində oynamağa haqq qazanan ''Adana Dəmirspor'' heyəti gücləndirmək yönündə qollarını çırmalayıb.

"Football-plus.az" xəbər verir ki, amma öncə rəhbərlik baş məşqçi məsələsini yoluna qoymalıdı. Çünki komandaya tarixində ilk dəfə avrokuboklara vəsiqə qazandıran italiyalı Vinçentso Montella artıq ayrılıb. Slaven Biliç və Andrea Pirlo da daxil olmaqla bir çox əcnəbi mütəxəssislə danışıqlar aparan başqan Murat Sancak onlardan biri ilə anlaşmaq üzrədi. Biliçi Türkiyəyə qaytarmaq mümkün olmadı. Ötən mövsüm ''Fatih Karagümrük''ü çalışdıran Pirlo isə vətəninə qayıtmağa üstünlük verərək ''Sampdoriya'' ilə anlaşdı. Adanalıların yeni çalışdırıcısı böyük ehtimalla Patrik Klyuvert olacaq. Futbolçu kimi ''Ayaks'' və ''Barselona'', eləcə də Niderland yığmasında sərgilədiyi oyunla yaddaşlarda iz buraxan Klyuvert məşqçi kimi əslində uzun illərdi çalışır. Amma o, demək olar, yüksək səviyyədə müstəqil məşqçi kimi işləməyib. PSJ-də idman direktoru, ''Barselona''da gənclərin inkişafına cavabdeh yönətici kimi çalışan 47 yaşlı Klyuvert ''Tvente''nin U-21, ''Ayaks''ın U-19 komandalarını çalışdırıb. Eləcə də ''Alkmaar'' və ''Neymegen''də hücumçular üzrə məşqçi, Niderland və Kamerun yığmalarında köməkçi məşqçi kimi işləyib. Klyuvert ən son qısa müddət Kyurasaonun baş məşqçisi olub. Avrokuboklar üçün heyətini gücləndirmək istəyən ''Adana Dəmirspor'' ''Köln''lə müqaviləsi bitən Qana yığmasının üzvü Kinqsli Şindleri transfer etməyə yaxındı. Eləcə də bu klub son mövsümdə vurduğu qollara diqqət çəkən və ''Fatih Karagümrük''dən ayrılaraq sərbəst oyunçuya çevrilən italiyalı hücumçu Fabio Borini ilə də danışıqlar aparır.