Volkan Dəmirəl ilə yollarını ayıran ''Fatih Karagümrük''lə bağlı maraqlı bir iddia ortaya atılıb.

Belə ki, İstanbul təmsilçisinin Andrea Pirloya təklif irəli sürdüyü məlum olub. Bu xəbəri italiyalı jurnalist Alfredo Pedulla yayıb. Xatırladaq ki, Pirlo ən son 2020/21 mövsümündə ''Yuventus''u çalışdırmışdı. Futbolçu kimi böyük nüfuza malik olan, məşqçi kimi isə hələ özünü sübut etməyən Pirlonun Türkiyənin ortabab klubunda işləməyə razılıq verib-verməyəcəyi bilinmir. Hərçənd Mario Balotelli kimi ünlü italyan futbolçunun və daha öncə ''Roma'', ''Milan'', ''Sevilya'' kimi klubları çalışdırmış italiyalı Vinçentso Montellanın ''Adana Dəmirspor''un təklifini qəbul etdiyini nəzərə alsaq, Pirlonun da ''Fatih Karagümrük''də işləməyə razılıq verməsi sürpriz olmaz. Ümumiyyətlə 2020-də 36 illik fasilədən sonra superliqaya qayıdan ''Fatih Karagümrük'' italyanlara maraq göstərməsi ilə diqqət çəkir. Son 2 ildə bu klubda Viviano, Bertolakki, Borini, Biraski kimi italiyalı futbolçular, eləcə də uzun illər A seriyasında top qovmuş Bilya kimi yarımmüdafiəçi çıxış edib. Qeyd edək ki, 43 yaşlı Pirlo ''Yuventus''un başında A seriyasında uğurlu çıxış etməsə də, ölkə superkuboku ilə ölkə kubokunu qazanmışdı.