Zeynal Zeynalov Polşaya ağır məğlubiyyətin səbəbini açıqladı
Polşanın Krakov şəhərində təşkil olunan 3-cü Avropa Oyunları davam edir. Ölkəmiz turnirdə bir çox idman növündə təmsil olunur.
Çimərlik futbolu millimizin də ilk matçı baş tutub. Yığma Polşa ilə qarşılaşmada 2:7 hesablı məğlubiyyətlə üzləşib. Növbəti oyun isə bu gün, saat 18.00-da Portuqaliyaya qarşı keçiriləcək.
İlk məğlubiyyətin səbəbləri maraqlıdı. Görəsən, matçda nələr yaşanıb? Qələbəyə nə mane olub?
Suallarımızı millimizin baş məşqçisi Zeynal Zeynalova ünvanladıq. Onun "Football-plus.az"a söylədikləri belə oldu:
"Ağır məğlubiyyətdi. Çox söz demək olmur. Oyunumuz alınmadı. Başqa cür planlaşdırmışdıq. Əsas oyunçuların əksəriyyəti məşq prosesinə son 3-4 gündə qoşulmuşdu. Deməzdim ki, fiziki hazırlıq səviyyəsinə görə geri qaldıq. Oyunçular meydanda əllərindən gələni etdilər. Hətta ilk qolu da biz vurmuşduq. Sadəcə, rəqib çox yaxşı oynadı".
Mütəxəssis növbəti oyundan gözləntilərini də bizimlə paylaşdı:
"Məğlubiyyətin komandada ruh düşkünlüyü yaradacağına inanmıram. Çalışırıq ki, hər şeyə rəğmən, motivasiyamız yaxşı olsun. Portuqaliya da çox güclü rəqibdi. Bizi çətin matç gözləyir. İnanıram ki, bundan sonrakı nəticələr 2:7 hesablı məğlubiyyəti unutduracaq".
Maraq üçün qeyd edək ki, millimiz ötən ilin sentyabrında Polşanı 6:2 hesabı ilə məğlub edərək 3-cü Avropa Oyunlarına vəsiqə qazanmışdı. Bununla tarixində ilk dəfə Avropada ilk "6-lığ"a düşmüşdü.
KƏNAN BAHADIR
Digər xəbərlər
