Bu mövsüm oyunu və məhsuldarlığı ilə diqqəti çəkən klublardan olan “Fatih Karagümrük”dən sürpriz bir xəbər var.

“Football-plus.az” xəbər verir ki, İstanbul təmsilçisi ünlü italiyalı mütəxəssis Andrea Pirlo ilə yollarını ayırmaq qərarına gəldi! Dünən bununla bağlı klubun saytında rəsmi bəyanat yerləşdirildi. Orda qeyd olundu ki, Pirlo və köməkçiləri ilə sona 3 tur qalmış yollar ayrılıb. Bu addım Pirlo ilə köməkçilərinin yeni mövsümün planlaşdırmasını rahat şəkildə etmələri üçün atılıb. Klub bəyanatda Pirloya 1 il ərzində gördüyü işlərə görə təşəkkür ünvanlayaraq ona gələcək karyerasında uğurlar arzuladı. Qeyd edək ki, daha öncə “Yuventus”u çalışdırmış 44 yaşlı Pirlo bu vəzifəyə ötən il iyunun 13-də gəlmiş və birillik müqaviləyə imza atmışdı. Düzdü, “Fatih Karagümrük” bu mövsüm ortabab statusundan çıxa bilmədi. Komanda superliqada 33 oyundan 11 qələbə, 11 heç-heçə, 11 məğlubiyyətlə ayrılaraq 44 xal toplayıb və 9-cu pillədə qərarlaşıb. Amma İstanbul təmsilçisinin məhsuldarlığı göz oxşayır. “Fatih Karagümrük” uzun müddət qol sayına görə yalnız “Fənərbaxça” ilə “Qalatasaray”dan geri qalırdı. Hazırda isə komanda bu göstəricidə 69 qolla 5-ci pillədədi. “Fatih Karagümrük”ün son 3 turda kimin başçılığı altında meydana çıxacağına da aydınlıq gətirib. Mövsümün sonuna qədər bu vəzifəni Alparslan Ərdəm yerinə yetirəcək. 2019-22-ci illərdə bu klubda futbolçu kimi forma geymiş 34 yaşlı Ərdəm bu mövsüm məşqçilər koprusuna daxil edilmişdi. Yəni o, Pirlonun köməkçilərindən biri idi. Pirlonun özünə gəlincə, Türkiyədə dərhal ona maraq göstərən klub peyda olub. Söhbət gələn mövsüm üçün superliqada oynamaq haqqı qazanan “Çaykur Rizəspor”dan gedir. Rizə təmsilçisi Bülənt Korkmazın başçılığı altında 1-ci liqada mövsümü 2-ci pillədə tamamlayaraq “Samsunspor”la yanaşı elitaya birbaşa vəsiqə qazanan iki klubdan biri oldu. Buna baxmayaraq, rəhbərliklə münasibətləri gərgin olan Korkmazın baş məşqçi postundan ayrılacağı gözlənilir. Müqavilə müddəti bitən təcrübəli məşqçiyə yeni anlaşma təklif olunmayacaq. Türkiyə mətbuatının yazdığına inansaq, qaradənizlilər Pirloya ciddi maraq göstərir. Tərəflər arasında gələn həftə ilk görüş keçiriləcək.

Bu arada “Fanatik” nəşrinin iddiasına inansaq, “Fatih Karagümrük” belə desək, İtaliya dəst-xəttini davam etdirmək niyyətindədi. Yeni mövsüm üçün həm Cennaro Qattuzo, həm də Filippo İnzaqi ilə görüşən rəhbərlik üstünlüyü ikinciyə verib. 49 yaşlı İnzaqi hazırda B seriyasında çıxış edən “Reccina”nı çalışdırır.