Hamımızın qısaca CAS kimi tanıdığımız İdman Arbitraj Məhkəməsində bundan sonra türkiyəli hakim də çalışacaq.

"Football-plus.az" xəbər verir ki, belə ki, Ərdəm Egemən bu hüquqa yiyələnməyi bacarıb. Bilindiyi kimi, İdman Arbitraj Məhkəməsi idman sahəsində mübahisəli məsələlər üzrə yekun qərarı vermək hüququna malik olan ən yüksək instansiyadı. CAS-ın hakimlər siyahısında dünyanın bir çox ölkəsindən tanınmış hüquqşünaslar yer alır. İdmanda müxtəlif mövzulardakı anlaşılmazlıqlar, xüsusilə dopinq, intizam cəzaları, transfer, eləcə də müqavilənin şərtlərinə əməl olunmaması kimi məsələlər zamanı məhz CAS-a müraciət olunur. Tam müstəqil və tərəfsiz şəkildə fəaliyyət göstərən İdman Arbitraj Məhkəməsi idmanda ədaləti və güvəni təmin etməyə xidmət edir. CAS-ın mərkəzi İsveçrənin Lozanna şəhərində yerləşir. Burda hakim kimi çalışanlar çox ciddi imtahanlardan və sınaqlardan keçirlər. Çox böyük uğura imza atan Ərdəm Egemən Türkiyə mətbuatına açıqlamasında bunları deyib: “CAS beynəlxalq müstəvidə söz sahibi olan əsas məhkəmədi. Burda uzun illər bir çox proseslərdə vəkillik etmişdim. Amma bundan sonra hakim kimi çalışacam. Çox sevincli və qürurluyam. Bu sahədə 20 illik təcrübəm var. Artıq bu təcrübəmdən fərqli şəkildə istifadə edə biləcəm. Fərdlərin və şirkətlərin ədalət axtarışına yardım etmək çox gözəl və qürurlu bir işdi”.

Egemən Trabzon Anadolu Liseyinin məzunudu. 2001-ci ildə Qalatasaray Universitetinin hüquq fakültəsini bitirdikdən sonra İngiltərəyə yollanaraq təhsilini orda davam etdirib və Mançester Universitetində də hüquq fakültəsini bitirib. 20 ildən çoxdu İstanbul Vəkillər Kollegiyasının üzvüdü. Bu müddətddə müxtəlif beynəlxalq hüquq bürolarında çalışıb. 2010-ci ildə hüquq məsələləri üzrə şəxsi şirkətini qurub. Uzun illərdi türk və əcnəbi vətəndaşların mübahisəli məsələlərində vəkil kimi fəaliyyət göstərib. Onun CAS-la neçənci ildən əlaqə qurduğu bəlli olmasa da, son illərdə özünün də dediyi kimi, idman məsələlərində də vəkil kimi çalışıb.