"İlyarımdı xalqımızın duası ilə bura qədər mübarizə aparmışıqsa, bu qələbədi" - AÇIQLAMALAR
44 günlük müharibəsi vaxtı “Qarabağ”ın mətbuat xidmətinin rəhbəri Nurlan İbrahimovun emosiyaların təsiri altında yazdığı status ermənilərə nə azı “Bayraktar” qədər təsir etdi.
Onların şikayəti əsasında UEFA Nurlan bəyin futboldan ömürlük uzaqlaşdırılmasına qərar verdi. Artıq məsələnin üstündən 2 ilə yaxın müddət keçib. Cəzadan narazı qalan İbrahimovun İdman Arbitraj Məhkəməsinə müraciət etdiyini də bilirsiz. Dinləmə prosesi də olub. Amma qurum indiyədək bir neçə dəfə qərar tarixini dəyişib. Məsələnin mayın 25-də həllini tapacağına ümid bəsləyirdik. Görünür, yenə bir müddət gözləməli olacağıq. Bu haqda məlumatı Nurlan İbrahimovun vəkili Fərid Haqverdiyev verdi. Fərid bəy qərar tarixinin iyulun 7-nə qədər uzadıldığını qeyd etdi.
Görəsən, məsələ nə üçün uzanır? İdman Arbitraj Məhkəməsi təxirəsalmanı necə əsaslandırıb? Fərid Haqverdiyevi dinləyək: “Bizə məktub gələndə səbəb yazmırlar. Sadəcə, məlumat verilir ki, qərarın verilməsi təxirə salındı. Açığı, İdman Arbitraj Məhkəməsində uzanan işlər, təxirəsalmalar olub. Birmənalı şəkildə hansısa səbəbdən uzandığını demək çətindi. Çünki bizə məlumat verilmir. İyulda yekun qərarın verilib-verilməyəcəyini də deyə bilmərəm. Yenə uzadıla bilər. Biz də istəyirik ki, qərar qəbul olunsun. Sadəcə, UEFA-nın qərarından ilyarımdan çox vaxt keçib. İyula kimi bu müddət daha da uzanacaq. Hazırda əlimizdən heç nə gəlmir. Sadəcə, gözləmə mövqeyindəyik”.
Nurlan İbrahimov təxirəsalmalar haqda nə düşünür? Bəlkə İdman Arbitraj məhkəməsi Azərbaycanla Ermənistan arasında sülh müqaviləsinin bağlamasını gözləyir? Prosesin uzanması onu yorur? “Qarabağ”ın sabiq mətbuat katibi məsələyə belə aydınlıq gətirdi:
“Məsələnin ölkələr arasındakı münasibətlə bağlı olduğunu düşünmürəm. Sadəcə, UEFA-nın qərarının hüquqi əsasları olmadığı bəllidi. İdman Arbitaj Məhkəməsi öz nüfuzunu qoruyur. Bu təxirəsalmalar göstərir ki, verilən qərar düzgün deyil. Təmənnasız mənə xidmət edən Fərid və Azərbaycan xalqının duası ilə birgə mübarizə aparıram. Hüquqi proseslər müəyyən güc tələb edir. Bugünümüzə də şükür. İlyarımdı xalqımızın duası ilə bura qədər mübarizə aparmışıqsa, bu qələbədi. Bir qərarın bu qədər təxirə salınması bizim doğru olduğumuzdan xəbər verir. 6-cı və ya 7-ci təxirəsalma da ola bilər. İstisna deyil. İstənilən halda, başverənlər bizim doğru olduğumuzu göstərir. Həyatdı, hər şey baş verə bilər. Xeyirlisi”.
Bu yerdə deməyə bir söz qalır: Allah Nurlan İbrahimova səbr, İdman Arbitraj Məhkəməsinə insaf versin!
İLKİN SULTANLI
Digər xəbərlər
