İyunun 13-ü səhər saatlarında MBA-da final seriyası başa çatdı.

"Football-plus.az" xəbər verir ki, əlbəttə, azarkeş marağı, dramatizm baxımından seriyanın 7-ci oyuna qədər uzanması daha maraqlı olardı. Ancaq indi “Denver” azarkeşləri sevincdən göyün 7-ci qatındadı. Çünki onların sevimli komandası 5-ci oyunda “Mayami”ni 94:89 hesabıyla məğlub etməklə tarixində ilk dəfə MBA çempionu olub. “Naqqets”in mərkəz oyunçusu Nikola Yokiç 28 xal və 16 ribaund ilə bu qələbəyə də önəmli töhfə verdi. Təsadüfi deyil ki, məhz serb ulduz final seriyasının MVP-si sayıldı. O, pley-offda keçirdiyi 20 oyunun hər birində orta hesabla 30 xal topladı, 13,5 ribaund etdi və 9,5 məhsuldar ötürmə verdi. Təbii ki, Yokiçin oyundan sonra deməyə sözü var idi: “İşi bitirdik, indi artıq evə getmək olar. “Mayami” böyük komandadı. Bu komandaya hörmətim böyükdü. 5-ci oyunu heç də yaxşı keçirmədik, atışları boşa verdik. Yaxşı ki, sonda necə müdafiə olunmalı olduğumuzu anladıq”.

Xatırladaq ki, top-15-dən kənarda draft olunan 28 yaşlı serb nəinki final seriyasının, həm də müntəzəm çempionatın MVP-si sayılıb. O, MBA tarixinə bir pley-offda xal, ribaund və ötürmə sayına görə liderlik edən ilk basketbolçu kimi də düşdü.

Qələbənin memarlarındaq danışırıqsa, “Denver”in baş məşqçisi Mayk Melounun da adını çəkməliyik: “Gördüyümüz çətin iş, fədakarlıq, bütün qurbanlarımız onunla nəticələndi ki, çempionatı qazandıq. Ancaq mənim burda olanlar üçün xəbərim var: bir titulla kifayətlənən deyilik. Daha artığını istəyirik. Növbəti addım sülalə-komanda olmaqdı”.

Meloun demək istəyir ki, “Denver” növbəti mövsümlərdə də titul uğrunda mübarizə aparsa, çempionluq qazansa, heç kim təəccüblənməsin. İş ondadı ki, bu, “Denver”in ilk çempionluğudu. Bununla da MBA klublarının ilk titulu qazanmaqla bağlı ən uzun seriyası qırıldı. “Naqqets”in qələbə həsrətinə 46-cı mövsümdə son qoyuldu. Bu mənada əvvəlki “rekord” 45-ci mövsümdə çempion olan “Klivlend”ə məxsus idi.

MBA-da ilk çempionluğu qazanana qədər ən uzun seriyalar:
46 – “Denver” (1976-2022)
45 – “Klivlend” (1970-2015)
40 – “Fort-Ueyn” / “Detroyt Pistons” (1948-88)
30 – “Dallas” (1980-2010)
26 – “San-Dieqo” / “Hyuston Rokets” (1967-93)

Uzun sürən həsrətdən sonra gələn ilk çempionluğun Kolorado ştatında böyük sevinclə qarşılanması təbiidi. Amma çempionluğu bayram edən azarkeşlər, necə deyərlər, “dozanı qaçırıb”. 9 nəfər atışma zamanı yaralanıb. İnsident iyunun 13-ü səhər saatlarında, “Denver”in ev oyunlarını keçirdiyi “Boll Arena”nın yaxınlığında baş verib. Oyun bitəndən təxminən 3,5 saat sonra azarkeşlərin toplaşdığı rayonların birində atışma başlayıb. 9 zərərçəkəndən üçünün vəziyyəti çox ağırdı, qalan altısının həyatına isə təhlükə yoxdu. Bu hadisəni törətməkdə şübhəli bilinən şəxs operativ şəkildə ələ keçirilib və artıq polis nəzarətindədi. O özü də yaralanıb.

13 iyun
Denver – Mayami 94:89 (22:24, 22:27, 26:20, 24:18)
Seriyada hesab – 4:1.