Dünən səhər saatlarında “Denver”lə “Mayami” arasındakı final seriyasında 2-ci oyun keçirildi.

"Football-plus.az" xəbər verir ki, səfərdə qələbə qazanan “Mayami” hesabı bərabərləşdirdi. Baxmayaraq ki, meydandakı ən məhsuldar oyunçu “Naqqets”dən Nikola Yokiç oldu – 41 xal, 11 ribaund.

“Mayami”nin forvardı Cimmi Batler isə komandasının qələbəsinə 21 xal, 4 ribaund və 9 məhsuldar ötürmə ilə töhfə verdi. Batler klub tarixinə bir pley-off mərhələsi boyunca 500+ xal, 100+ ribaund və 100+ məhsuldar ötürmə göstəricisinə nail olmağı bacaran 3-cü basketbolçu kimi düşdü. Əvvəllər bunu Lebron Ceyms və Dueyn Ueyd bacarıb. 33 yaşlı Batler builki pley-offun 19 oyununda iştirak edib, hər oyunda orta hesabla 27,3 xal toplayıb, 6,8 ribaund edib və 5,9 məhsuldar ötürmə verib.

Daha bir maraqlı xəbəri nəzərinizə çatdıraq. Repçi Dreyk “Denver”in qələbəsinə necə əmindisə, bukmeker kontorunda bu mərcə 1 milyon dollar qoyub. Dreyk ayrıca “Denver”in seriyadan məhz 4:1 hesablı qələbə ilə ayrılacağına da 250 min dollar yatırıb. Hər iki bəhs doğrulacağı halda, məşhur musiqiçi 2 milyon 80 min dollar qazanacaq.

5 iyun
Denver – Mayami 108:111 (23:26, 34:25, 26:24, 25:36)
Seriyada hesab – 1:1.