Dünən İstanbulda Çempionlar Liqasının finalı baş tutdu.

“Football-plus.az” xəbər verir ki, daha öncə bu şəhər 2005-də bu turnirin həlledici oyununu qəbul etmişdi. Həmin vaxt ''Liverpul'' ilə ''Milan''ın dueli 3:3-lük bərabərliklə yekunlaşmış və bu, XXI əsrdə ÇL-in ən məhsuldar finalı olmuşdu. Amma bu dəfə məhsuldarlıq yüksək olmadı və son illərin ənənəsi davam etdi. ''Mançester Siti'' ''İnter''i Rodrinin qolu ilə minimal hesabla məğlub etdi. Bununla da ardıcıl 4-cü mövsüm ÇL-in finalında 1:0 hesabı qeydə alındı!

Ötən il bu hesabla ''Real'' ''Liverpul''u, 2021-də ''Çelsi'' ''Mançester Siti''ni və 2020-də ''Bavariya'' PSJ-ni məğlub etmişdi. Turnirin tarixində yalnız bir dəfə finallarda bu cür uzunmüddətli seriya olub. Maraqlı ki, həmin vaxt da 1:0 hesabları qeydə alınıb. 1978-83-cü illərdə ardıcıl 6 il finalda qalib 1 qolla müəyyənləşib.