Baş tutan 2 qarşılaşma ilə Çempionlar Liqasında 1/8 final mərhələsinin ilk görüşlərinə yekun vuruldu.

Football-plus.az xəbər verir ki, ''Mançester Siti'' ''Leyptsiq'' səfərində qələbə hesabını qoruya bilməyərək 1:1-lik bərabərliklə kifayətləndi. ''İnter'' isə ''Portu''nu minimal hesabla yendi. Bu nəticələrdən sonra ortaya maraqlı bir görüntü çıxdı.

İngiltərə klublarının hamısı qələbəyə həsrət qaldısa, hər 3 İtaliya klubu qalib gəldi. Çərşənbə axşamı bilindiyi kimi ''Liverpul'' öz meydanında ''Real''la görüşdə 2:5 hesablı rüsvayçı məğlubiyyətlə üzləşmişdi. Keçən həftə isə ''Çelsi'' Dortmund ''Borussiya''sına, ''Tottenhem'' də ''Milan''a minimal hesabla boyun əymişdi.

Premyer-liqanın dünyanın ən varlı milli çempionatı olması heç kimə sirr deyil. Bu qış təkcə ''Çelsi''nin transferlərə xərci İspaniya, İtaliya, Almaniya, Fransa klublarının ümumi xərcini ötmüşdü. Amma göründüyü kimi pul heç də hər zaman qələbə üçün kifayət etmir. İngiltərə klublarının hamısının 1/8 finalın ilk oyunlarında qələbəyə həsrət qalmasına sonuncu dəfə 8 il öncə - 2014/15-də rast gəlinmişdi. Düzdü, o vaxt bu mərhələdə bu ölkənin 4 yox, 3 təmsilçisi iştirak edirdi.

Həmin mövsüm ''Arsenal'' ''Monako'', ''Mançester Siti'' ''Barselona'', ''Çelsi'' isə PSJ səddini adlaya bilməmişdi. İngilislərdən fərqli olaraq İtaliya klubları yüksəlişdədi. ''İnter'' və ''Milan''dan başqa ''Napoli'' də ''Ayntraxt'' səfərindən qələbə ilə döndü.

Maraqlıdı ki, daha öncə İtaliya klublarının hamısının 1/8 finalın ilk oyunlarında qalib gəlməsi faktına rast gəlinməmişdi.