İspaniya klublarının 21-ci əsrdə avrokuboklarda dominantlıq etməsi heç kimə sirr deyil.

“Football-plus.az” xəbər verir ki, bütün başqa məqamlar öz yerində, sadəcə, bir faktın üzərində dayanmaq kifayətdi. İspaniya klubları başqa ölkələrin təmsilçiləri ilə qarşılaşdığı son 18 finalın hamısında qalib gəlib. Bəs bu seriya nə vaxt başlayıb?

İspaniya klublarının başqa ölkələrin təmsilçiləri ilə son 18 finalı
2002. Çempionlar Liqası. Real – Bayer-04 (Almaniya) 2:1
2004. UEFA kuboku. Valensiya – Marsel (Fransa) 2:0
2006. Çempionlar Liqası. Barselona – Arsenal (İngiltərə) 2:1
2006. UEFA kuboku. Sevilya – Midlsbro (İngiltərə) 4:0
2009. Çempionlar Liqası. Barselona – Mançester Yunayted (İngiltərə) 2:0
2010. Avropa Liqası. Atletiko – Fulhem (İngiltərə) 2:1
2011. Çempionlar Liqası. Barselona – Mançester Yunayted (İngiltərə) 3:1
2014. Avropa Liqası. Sevilya – Benfika (Portuqaliya) 0:0, p. – 4:2
2015. Çempionlar Liqası. Barselona – Yuventus (İtaliya) 3:1
2015. Avropa Liqası. Sevilya – Dnepr (Ukrayna) 3:2
2016. Avropa Liqası. Sevilya – Liverpul (İngiltərə) 3:1
2017. Çempionlar Liqası. Real – Yuventus (İtaliya) 4:1
2018. Çempionlar Liqası. Real – Liverpul (İngiltərə) 3:1
2018. Avropa Liqası. Atletiko – Marsel (Fransa) 3:0
2020. Avropa Liqası. Sevilya – İnter (İtaliya) 3:2
2021. Avropa Liqası. Vilyarreal – Mançester Yunayted (İngiltərə) 1:1, p. – 11:10
2022. Çempionlar Liqası. Real – Liverpul (İngiltərə) 1:0
2023. Avropa Liqası. Sevilya – Roma (İtaliya) 1:1, p. – 4:1

• Uduzulan son finallar 2001-ci ildə qalıb. Həmin il “Valensiya” Çempionlar Liqasının finalında “Bavariya”, “Alaves” isə UEFA kubokunun finalında “Liverpul” qarşısında “ağ bayraq qaldırıb”.
• Ayrı-ayrı avrokuboklar üzrə final sayı təxminən bərabərdi: ÇL-in finalında 8, UEFA kubokunun/Avropa Liqasının finalında 10 qələbə var. Konfrans Liqası hələ ki fəth olunmayıb.
• Aşkar liderlər “Sevilya”, “Real” və “Barselona”dı. Sevilya klubu Avropa Liqasında (və UEFA kubokunda) dominantlıq edir: 22 il ərzində başqa ölkələrdən olan rəqiblər üzərində 6, üstəlik burda nəzərə alınmayan “Espanyol” üzərində qələbə var. “Real” və “Barsa” ÇL-in finalında başqa liqaların təmsilçilərini hərəyə 4 dəfə məğlub edib, “ağ şimşəklər”in “Atletiko” üzərində iki qələbəsini də unutmayaq.
Son illərdə istisnasız “Sevilya” ilə “Real”ın hegemonluğu hökm sürür. “Barsa”nın son qələbəsi uzaq 2015-də qalıb, kataloniyalılar həmin ildən bəri yalnız bir dəfə 1/4 finaldan uzağa gedə bilib. Söhbət “Liverpul”un yarımfinalda möhtəşəm geridönüşü reallaşdırdığı ÇL-in 2018/19 mövsümündən gedir.
Başqa klublar bu mənada bir qədər təvazökardı. “Atletiko” UEFA kubokunda/Avropa Liqasında iki qələbə qazanıb (üçüncüsü “Atletik” üzərində), “Vilyarreal” ilə “Valensiya”nın hərəyə bir qələbəsi var.
• İspaniya klublarının finalda bir-biri ilə qarşılaşması ayrıca tarixçədi. Bu müddətdə 4 belə oyun olub. “Real” “Atletiko”nu ÇL-in 2013/14 və 2015/16 mövsümlərinin finalında məğlub edib. “Sevilya” UEFA kubokunun 2006/07 mövsümünün finalında “Espanyol”dan (2:2, p. – 3:1), 5 il sonra isə “Atletiko” Avropa Liqasının finalında “Atletik”dən (3:0) üstün olub.
• Başqa ölkə təmsilçiləri ilə son 18 finaldan yalnız üçündə penalti seriyasına əl atılıb, qalan bütün oyunlarda İspaniya klubları inamlı qələbə qazanıb.
Bütün faktları sadalayandan sonra ağla gələn ilk sual budu: görəsən, İspaniya klublarının qələbə seriyasına kim və nə vaxt son qoyacaq?