''Real'' dünən Çempionlar Liqasının finalında Vinisiusun qolu ilə ''Liverpul''u minimal hesabla məğlub etdi.

Madrid nəhəngi son 9 ildə 5-ci, tarixində 14-cü dəfə Avropanın bir nömrəli klub turnirinin qalibi oldu.

''Kral klubu'' qələbəyə görə ilk növbədə Tibo Kurtuaya minnətdar olmalıdı. Belçikalı qapıçı finalda tarixə düşəcək bir performans sərgilədi. Kurtua nə az, nə çox - düz 9 seyv edərək finalın ən yaxşı oyunçusu seçildi. Turnir ÇL adı ilə keçirilməyə başlandığı 1992-ci ildən bu yana heç bir qapıçı finalda 9 qurtarış etməmişdi. Kurtua ÇL-in finalında ən yaxşı oyunçu seçilən cəmi 3-cü qapıçı oldu. Daha öncə bunu 2001-də ''Bavariya''lı Oliver Kan və 2008-də ''Mançester Yunayted''li Edvin van der Sar olmuşdu. Amma bu iki qapıçı əsasən oyunsonrası penaltilər seriyasında özlərini yaxşı tərəfdən göstərmişdilərsə, Kurtua bu ada 90 dəqiqə ərzində sərgilədiyi inanılmaz oyunla nail oldu. Ümumiyyətlə 30 yaşlı əlcək sahibi ÇL-də cari mövsümü möhtəşəm səviyyədə keçirdi. O, 13 qarşılaşmada ümumilikdə 55 (bəzi mənbələrdə 57 və 59 qeyd olunub) seyv etdi! Bu, müvafiq statistikanın aparılmağa başlandığı 2003/04-dən bu yana bir qapıçı üçün rekord göstəricidi. Bunun necə böyük nəticə olduğunu göstərmək üçün bir faktı qeyd edək ki, ''Mançester Siti''nin qapıçısı Ederson premyer-liqada mövsüm ərzində, yəni 37 qarşılaşmada 57 qurtarış edib. Finalın digər iştirakçısı ''Liverpul'' un qapıçısı Alisson isə bu mövsüm ÇL-də ümumilikdə 12 seyvlə yadda qaldı.