Dünyanın ən nüfuzlu hokkey liqasında yeni mövsüm start götürüb.

Bu üzdən müxtəlif proqnozların səslənməsi təbiidi. MHL-in rəsmi saytının müəllifləri Stenli kuboku uğrunda mübarizənin favoritləri ilə bağlı fikirlərini bölüşüblər. Sorğuya 15 müəllif qatılıb. Jurnalistlərin fikrincə, titul uğrunda mübarizədə favoritlər “Karolina” və “Kolorado”du – bu komandalara, uyğun olaraq, 6 və 4 adam səs verib. “Florida” və “Edmonton” hərəyə 2, “Tampa-Bey” 1 səs qazanıb.

MHL də yenicə start götürən mövsümlə bağlı 50 hokkeyçi arasında sorğu keçirib. 32 hokkeyçi belə hesab edir ki, Stenli kubokunu “Kolorado” qazanacaq. Sorğuda 2-ci yeri tutan “Tampa-Bey”ə 5 hokkeyçi səs verib. “Kalqari” və “Karolina” hərəyə 3, “Florida” və “Reyncers” hərəyə 2 səs qazanıb. Daha 1 hokkeyçi “Toronto”nun xeyrinə seçim edib, ikisi isə favoriti seçməkdən boyun qaçırıb.

Bu arada MHL-in rəsmi saytı mövsümün ən yaxşı 10 oyunçusunun siyahısını dərc edib. Yenicə başlayan mövsümün ən yaxşı oyunçusu “Edmonton”un forvardı Konnor Makdeviddi, 2-ci yerdə “Kolorado”nun müdafiəçisi Keyl Makar, 3-cü yerdə isə “Toronto”nun forvardı Ostin Mettyus qərarlaşıb. “Top-10”
ilə tanış olun:

1. Konnor Makdevid (Edmonton)
2. Keyl Makar (Kolorado)
3. Oston Mettyus (Toronto)
4. Natan Makkinnon (Kolorado)
5. Leon Drayzaytl (Edmonton)
6. Andrey Vasilevski (Tampa-Bey)
7. Sidni Krosbi (Pittsburq)
8. Viktor Hedman (Tampa-Bey)
9. Aleksandr Barkov (Florida)
10. Aleksandr Oveçkin (Vaşinqton).

“Cap Friendly” isə MHL komandalarının orta yaşı ilə bağlı statistika hazırlayıb. MHL-in ən gənc komandası “Baffalo”da orta yaş 25-di. Bu mənada “top-5”ə “Ottava” (25,7), “Arizona”, “Kolambus” və “Nyu-Cersi” (25,9) də daxildi. Ən yaşlı komandalar isə “Tampa-Bey” (29,1), “Vaşiqnton” (30) və “Pittsburq”du (30,3). MHL-in son çempionu “Kolorado” siyahının 12-ci pilləsində qərarlaşıb. Bu komandada orta yaş 27,1-di.
Yeri gəlmişkən, “Kolorado”ya çempionluq üzükləri təqdim olunub. “Evelanş”ın oyunçuları, məşqçi korpusunun üzvləri və klub sahibləri üçün üzüklər 14 karatlıq qızıldan hazırlanıb. Üzükdə brilyant, yaqut və sapfirdən də istifadə olunub. Xatırladaq ki, “Kolorado” Stenli kuboku uğrunda seriyada “Tampa-Bey”i 4:2 hesabıyla məğlub etməklə tarixində 3-cü çempionluğu qazanıb. Komanda buna qədər 1996 və 2001-ci illərdə də Stenli kubokunun qalibi olmuşdu.

12 oktyabr
Reyncers – Tampa-Bey 3:1 (0:0, 1:1, 2:0)
Los-Anceles – Veqas 3:4 (1:0, 0:1, 2:3)