Türkiyəli məşqçinin Avropa ölkələrindən birində çalışması o qədər də tez-tez baş vermir.

“Football-plus.az” xəbər verir ki, amma gələn mövsüm Avropanın göbəyində - futbolun vətəni İngiltərədə türkiyəli məşqçi işləyəcək. Söhbət Erol Bulutdan gedir. Belə ki, çempionşip trəmsilçisi “Kardiff Siti” bu mütəxəssislə anlaşma əldə olunduğunu rəsmən açıqlayıb. Anlaşmanın müddəti barədə məlumat verilmir. Klubun sahibi Vensan Tan Buluta tərif yağdırıb: “Uzun araşdırmalardan sonra klubumuz üçün ən yaxşı ismi seçdiyimizə inanırıq. Buluta uğurlar arzulayıram. Həm oyunçu, həm də baş məşqçi kimi böyük təcrübəyə malikdi. Onun futbol ehtirası və uğura ac olması xoşuma gəlir. Təkbətək söhbət zamanı işə yanaşma tərzini və iş etikasını da bəyəndim. Avropa futbolundakı mükəmməl keçmişi ona “Kardiff Siti”də daha öncə sahib olmadığımız bir məşqçilik profili aşılayır”.
Erol Bulutun hansı uğuru ilə “Kardiff Siti”nin sahibini heyran etdiyi hələ ki bəlli deyil. Onun həqiqətən də çox yaxşı futbolçu karyerası olub. Bulıut “Fənərbaxça”da, “Trabzonspor”da, Almaniya, Yunanıstan və Ukrayna klublarında oynayıb. “Olimpiakos”un heyətində hətta Çempionlar Liqasında “Real”a qol da vurub. Amma məşqçi kimi onun özünü yüksək səviyyədə sübut etdiyini söyləmək çox çətindi. Düzdü, “Yeni Malatyaspor” və “Alanyaspor”da onun əl işi bilinirdi. Alanyalılarla hətta 2020-də Türkiyə kubokunu da qazanmağı bacarıb. Amma o, karyerasının əsas sınağının öhdəsindən gələ bilmədi. 48 yaşlı mütəxəssis 2020-də böyük ümidlərlə “Fənərbaxça”nın başına gətirilsə də, mövsüm bitməmiş vəzifəsindən ayrılmalı oldu. Bulutun sonuncu iş yeri “Qaziantep” idi və o klubdan bu ilin yanvarında ayrılmışdı. Uelsin eyniadılı şəhərini təmsil edən “Kardiff Siti”yə gəlincə, bu klub geridə qoyduğumuz mövsümdə çempionşipdəki yerini çətinliklə qoruya bildi. Klubu ən son fransalı Səbri Lyamuşi çalışdırmışdı. “Kardiff Siti” onun dönəmində 18 oyundan 6 qələbə, 2 heç-heçə, 10 məğlubiyyətlə ayrılaraq mövsümü 49 xalla 21-ci, yəni düşmə zonasından bir pillə yuxarıda tamamladı. 124 illik tarixə malik olan və premyer-liqada sonuncu dəfə 2018/19-da oynayan “Kardiff Siti” 2008-də ölkə kubokunun və 2012-də Liqa kubokunun finalında oynasa da, hər iki görüşdə məğlub olub. 1927-də İngiltərə kubokunu qazanan “göy quşlar” bu turnirin tarixində çempion olmağı bacaran ilk və hələ ki yeganə başqa ölkə klubudu.

Onu da bildirək ki, klubun direktorlar şurasının sədri türkiyəli biznesmen Mehmet Dalmandı. Bu yerdə xatırladaq ki, çempionşipdə mübarizə aparan Acun Ilıcalının klubu “Hall Siti” də türkiyəli Əmrə Belözoğlu ilə anlaşmağa yaxındı.