Sem Ellardaysın “Lids”lə əməkdaşlığı qısa sürüb. O, artıq baş məşqçi vəzifəsini tərk edib.

“Football-plus.az” xəbər verir ki, klubun rəsmi saytının yaydığı xəbərə görə, təcrübəli mütəxəssis bu qərarı “Lids”in premeyr-liqanı tərk etməsindən sonra verib. İngilis çalışdırıcı çempionşip adlanan 2-ci divizionda çıxış edəcək komandada işləmək istəməyib. Ellardays komandaya mayın 3-də təyin edilmişdi. “Lids” onun rəhbərliyi altında 4 oyuna çıxıb, 3 matçda uduzub, 1 oyunda isə heç-heçə edib. Xatırladaq ki, komanda mövsümü 38 oyuna 31 xalla 19-cu yerdə başa vurub. Yerli mənbələr yorkşirliləri xilas edəcəyi halda baş məşqçi ilə müqavilənin yenilənəcəyi və ona 3 milyon funt sterlinqdən çox bonus ödəniləcəyini xəbər vermişdi.

Əlavə edək ki, 68 yaşlı Ellardays karyerası ərzində “Vest Hem”, “Sanderlend”, “Nyukasl”, “Everton”, “Kristal Pelas”, “Vest Bromviç”, “Bolton” və “Blekpul” klublarını, həmçinin qısa müddətdə İngiltərə yığmasını da çalışdırıb.