Uğursuz mövsüm keçirən, mövsümboyu daha çox autsayderlər arasında yer alan “Sumqayıt”da “yarpaq tökümü” davam edir.

Qapıçı Aydın Bayramovun “Turan Tovuz”a üz tutduğunu bir neçə gün öncə xəbər vermişdik. Bu arada daha bir yerli futbolçunun “kimyaçılar”dan ayrıldığı məlum olub. Söhbət Süleyman Əhmədovdan gedir. Yarımmüdafiəçinin artıq yeni klubu da məlumdu. 23 yaşlı futbolçu yeni mövsümdən “Səbail”in şərəfini qoruyacaq. Klubla müqaviləsi başa çatan digər yerlilərin taleyinə isə bu həftə keçiriləcək klubdaxili toplantıda aydınlıq gələcək. Legionerlərə gəlincə, onlardan yalnız Masaki Muratanın “Sumqayıt”da qalacağı məlumdu. “Football-plus.az” xəbər verir ki, komandanın baş məşqçisi Samir Abbasov rəhbərlikdən digər əcnəbilərin yola salınmasını istəyib.

Heyətdə islahat aparan “gənclik şəhəri”nin təmsilçisi yaranmış boşluqları doldurmaq üçün yeni futbolçular axtarışına çıxıb. Başa çatan mövsümdə “Qəbələ”nin heyətində sabit oyunu ilə seçilən Məqsəd İsayev “kimyaçılar”ın “radarına” düşüb. Samir bəy İsayevi komandasında görmək istəyir. Kluba yaxın mənbədən əldə etdiyimiz bilgiyə əsasən məşqçilər korpusu bu dəfə legioner seçimində yanlışlığa yol verməmək üçün daha diqqətli olmağa çalışır. Hazırda “Sumqayıt” əsasən Polşa, Macarıstan və Serbiya çempionatında top qovan, aylıq məvacibi 15-20 min manat aralığında olan oyunçularla maraqlanır. Mənbəmizin sözlərinə görə, məşqçilər korpusuna təqdim olunan siyahıda 20-yə yaxın legionerin adı var.

RƏŞAD