Mövsüm başa çatandan sonra istirahətə buraxılan “Sumqayıt” sabah doğma şəhərdə bir araya gələcək.
Aleksey Baqanın baş məşqçi olduğu kollektivin ilk məşqi saat 11.00-a planlaşdırlıb. Hazırlığın ilk günündə düşərgədə legionerin olmayacağı məlumdu. “Gənclik şəhəri”nin təmsilçisinin maraq dairəsinə düşən bir neçə əcnəbi var ki, onlar böyük ehtimalla, komandanın Türkiyə toplanışına qatılacaqlar. Xatırladaq ki, “Sumqayıt” iyulun 16-dan 30-dək qardaş ölkənin Bolu bölgəsində toplanışda olacaq. “Kimyaçılar” orda olduğu müddətdə 3 yoxlama oyunu keçirməyi planlaşdırır. Rəqiblərin kimliyi və oyunların keçiriləcəyi tarix isə hələlik müəyyənləşməyib.
Bu arada “Sumqayıt”ın mövsümlərarası fasilədə “rənglərinə bağlayacaq” ilk oyunçunun adı bəlli olub. Etibarlı mənbədən əldə etdiyimiz məlumata görə, ötən mövsüm Türkiyənin birinci liqasında mübarizə aparan “Keçiörəngücü”nün şərəfini qoruyan Vüsal İsgəndərli “kimyaçılar”la danışıqları yekunlaşıdırıb. 26 yaşlı yarımmüdafiəçi sabah yeni klubu ilə rəsmi müqavilə bağlayacaq.
Mövsümün sonunda “ağ-göylər”lə müqaviləsinin müddəti başa çatan, Əli Qurbanininin də karyerasını harda davam etdirəcəyinə aydınlıq gəlib. Milliyə də cəlb olunan ucaboy forvard sabiq klubu “Fulad”a qayıdıb. Forvardın bir illik anlaşmaya qol çəkdiyi bildirilir. O da bəllidi ki, Qurbaninin yeni komandasında illik məvacibi 200 min dollara yaxındı.
RƏŞAD