Mövsüm başa çatmamış iki futbolçusu – Vurğun Hüseynov və Vüqar Mustafayevlə yeni müqavilə bağlayan “Sumqayıt” rəhbərliyi hələ ki transfer çalışmalarını dondurub.

Rəsmilər yeni keçidlər üçün komandanın əsas sponsoru “Azərikimya”nın qarşıdakı mövsüm üçün kluba ayıracağı büdcənin təsdiqlənməsini gözləyir.
Bu arada “kimyaçılar”ın yolları ayırdığı bəzi futbolçuların adları bəlli olub. Kluba yaxın mənbədən “Football-plus.az” saytına daxil olan məlumata görə, Aleksey Baqa Belarusa yollanmamışdan öncə rəhbərlikdən Elton Turabovla Nəbi Məmmədovun yola salınmasını istəyib. “Gənclik şəhəri” təmsilçisinin əsas qol ümidi Əli Qurbaninin də düşərgədə qalmayacağı dəqiqləşib. Hücumçunun maaşının yüksək olması və geridə qalan “futbol ili”ndə etimadı doğrultmaması səbəbindən ona yeni müqavilə təklif olunmayıb.

Mənbəmizin sözlərinə inansaq, Höccət Haqverdi, Elvin Məmmədov və son 3 turda “kimyaçılar”ın uğurları üçün tər tökən Anatoli Nuriyevin taleyinə aydınlıq gəlməyib. Nuriyev Ukraynadakı vəziyyəti nəzərə alıb fikrini bildirməlidisə, Höccətlə Elvin haqda son qərarı baş məşqçi verəcək.

RƏŞAD