“Son turda hər iki “cəbhə”də gərgin mübarizənin şahidi olduq. “Şamaxı” ilə “Səbail”in turnir cədvəlindəki mövqeyi qarşılaşmaya rəng qatdı. Mən də stadionda idim. Əvvəldən bəlli idi ki, “dənizçilər” heyətinə görə “şirlər”dən üstündü. Xal baxımından öndə olması da ev sahibinin qələbə şansını artırmışdı. Heç-heçə belə işə yarayırdı ki, “Səbail”in oyun tərzi məhz buna hesablanmışdı. “Şamaxı”nın da qalib gəlmək istəyi hiss olunurdu. Lakin heyətin təcrübəsizliyi buna imkan vermirdi. Fikrimcə, vacib mövqelərdə 3 legioner olsaydı, “şirlər” mövsümü turnir cədvəlinin ortalarında bitirərdi. Çünki bir çox qarşılaşmada “Şamaxı”nın canfəşanlığı hiss olunurdu. Bəli, komanda zəif oyunlarla da yadda qaldı. Amma buna “Qarabağ”ın tarixində də rast gəlmək mümkündü. Lakin bu kifayət etmir. Premyer-liqadakı yerini qorumaq üçün “Şamaxı”ya daha keyfiyyətli futbolçular lazım idi.

“Qəbələ” və “Zirə” arasındakı mübarizəyə gəlincə, bir çox xüsusiyyətlərdə yaxın klublardı. Hər iki komanda ölkə çempionatında liderlərə çətin anlar yaşatmağı bacarıb. “Zirə” “Sumqayıt”la qarşılaşmada yaxşı performans göstərərək 3 xal qazandı. Öz növbəsində “Qəbələ” də əzmkarlıq nümayiş etdirdi. Həlledici matçda “Kəpəz”lə bərabərlik məsələyə son nöqtəni qoyurdu ki, bunu da bacardılar”.