"Qarabağ" Patrik Andrade problemini həll edə bilmir.

Futbolçu böyük ehtimalla Ağdam təmsilçisindən ayrılacaq. Çünki danışıqlar dalana dirənib.

Redaksiyamıza bununla bağlı maraqlı informasiya daxil olub. Ağdam təmsilçisinə keçərkən illik 130 min dollar qazanan futbolçu maaşının artırılmasını istəyir. "Zirə" ilə kubokun finalından sonra klub yarımmüdafiəçi ilə görüşüb və ona illik 400 min dollar təklif olunub. Lakin Andrade bunu qəbul etməyib. O, Ağdam təmsilçisindən 600 min dollar tələb edib. Bu da onun klubun ən çox qazanan futbolçusu olması anlamına gəlir. Amma Ağdam təmsilçisi 400 min dollar üzərində dayanıb.

Yuxarıda qeyd olunan tarixdən etibarən onunla əlaqə saxlanılmır. Maraq üçün qeyd edək ki, Andrade "Qarabağ"ın Çempionlar Liqası və ya başqa turnirlərdə uğur qazanmasının əsas olmadığını, yaşının çoxluğu ilə bağlı daha çox pul qazanmaq istədiyini dilə gətirib.

Qeyd edək ki, Patrik bu mövsüm Ağdam təmsilçisində 39 matçda meydanda olub. 29 yaşlı futbolçu bu oyunlarda 5 qol vurub, 7 məhsuldar ötürmə edib.

İLKİN SULTANLI