AFFA növbəti mövsümdən divizion klublarının sayını artıracağını xəbər vermişdik.

Assosiasiyanın baş katini Sərxan Hacıyev mətbuata açıqlamasında say artımının Region Liqasında çıxış edən komandaların hesabına gerçəkləşəcəyini dəfələr bildirib. Onu da qeyd edib ki, həvəskar statusa malik komandalar arasında ən yaxşı infratsruktura malik 4 bölgə təmsilçisini divizionda dəvət etməklə iştirakçı sayını 10-a çatdırmaq niyyətindədilər.

Son günlər mətbuatda yazılanlara görə, “dördlük”dən biri “İrəvan”dı. O da məlumdu ki, artıq AFFA Qərbi Azərbaycanı təmsil edəcək kluba divizionda gəlmək yolunda “yaşıl işıq” yandırıb. Bu səbəbdən klub rəhbərliyi artıq ev oyunlarını keçirəcək stadionu da müəyyənləşdirib. “ASK Arena” “İrəvan”ın yeni məkanı olacaq.

Bir müddət əvvəl “Füzuli”nin də divizionda iştirak edəcəyi söyləniləsə də, etibarlı mənbədən “Football-plus.az”a ötürülən bilgiyə əsasən, Vasif İsmayılovun baş məşqçisi olduğu komandanın müraciətinə mənfi cavab verilib. Əvəzində Region Liqasında Mərkəz regionunda çıxış edən Saatlı “Araz”ı bu hüquqa yiyələnib. Saatlıda normal stadionun, lazımi infrastrukturun olması seçimdə başlıca rol oynayıb.

2022/23 “futbol ili”ndə qeydiyyat ünvanını dəyişməyə yaxın olan komandalardan biri də Yevlax “Karvan”ıdı. Aran bölgəsindən redaksiyamıza daxil olan məlumata əsasən hazırda Yevlax stadionunda yenidənqurma işləri aparılır. Paltardəyişmə, hakimlər otaqları təmir olunur, ot örtüyünə əl gəzdirilir. Mənbəzmizin sözlərinə görə, görülən işlər “Karvan”ın divizionda çıxış etməsinə hesablanıb.

Diviziona gələcək 4-cü komandanın adı isə məlum deyil. Bəlkə də AFFA rəhbərliyinin bu yöndə hansısa planı var. Ancaq qeyri-müəyyənlik olduğundan, assosiasiya rəsmiləri qərar verməkdən ehtiyat edir.

RƏŞAD