Yaxın keçmişə damğa vuran oyunçulardan biri olan Andres İnyesta Yaponiyadan ayrılmaq qərarına gəlib.

Xatırladaq ki, DÇ-2010-un qalibi 2018-də əfsanəsi olduğu ''Barselona''dan ayrılaraq Yaponiya təmsilçisi ''Vissel Kobe'' ilə müqavilə imzalamışdı. Bu klub əfsanəvi futbolçunun gəlişindən sonra 2019-da İmperatorluq kubokunu, 2020-də ölkə superkubokunu qazanmışdı. İnyestanın müqaviləsi 2024-ə qədər nəzərdə tutulmuşdu. Amma son dönəmlərdə o, çox az oynayırdı. Yaponiya çempionatında bu mövsüm artıq 14 tur arxada qalıb və ''Vissel Kobe'' liderdi. Amma İnyesta cəmi 3 matçda, ümumilikdə 38 dəqiqə meydanda olub. Görünür, məhz bu məqam onu ayrılmağa vadar edib. İnyesta son matçını iyulun 1-də keçirəcək. İyunun 6-da isə ''Vissel Kobe'' yoldaşlıq oyununda ''Barselona'' ilə qarşılaşacaq. Ümumilikdə İnyesta bu klubda keçirdiyi 133 rəsmi oyunda 26 qol, 25 məhsuldar ötürmə ilə fərqlənib.

Maraqlıdı ki, 39 yaşlı yarımmüdafiəçi karyerasını bitirməyə tələsmir. Onun ''Barselona''ya qayıtmaq ehtimalının olması haqda xəbərlər yayılsa da, İnyesta bunun baş tuta biləcəyinə inanmadığını vurğulayıb. Onun karyerasını Səudiyyə Ərəbistanı və ya Qətərdə davam etdirməsi ehtimalı daha realdı.