Hər iki komandanın heyətində müəyyən dəyişikliklər var idi.

İki oyundu istirahət edən Yusif İmanov derbidə ilk "11-lik"də yer almışdı. Murad Musayevin maraqlı gedişlərindən biri də Sebalyosu sol cinah vingeri, Mikelsi hücumçu kimi oynatması idi. Rəşad Sadıqov isə Rəhimə yenə forvard kimi güvənmişdi. Yəni komandalar meydana sırf hücumçusuz çıxmışdı.

Oyun qonaqların təzyiqi altında başladı. "Zirə"nin meydana 3 xal üçün çıxdığı aşkar hiss olunurdu. "Bayquşlar" isə əks-hücumlara bel bağlamışdı. Aleksey İsayevin uzun ötürmələri meydan sahiblərinə üstünlük yaradırdı. Amma ilk 30 dəqiqədə hər iki komandanın kəsərsiz hücumlarının şahidi olduq. İlk real qol şansını "Sabah" yaratdı. Kaşuk üzbəüz qaldığı Cənnətovu məyus edə bilmədi. Ümumiyyətlə, ilk 45 dəqiqənin sonlarına doğru "tələbələr" basqılı oyun sərgiləyirdi. Bununla belə, fasiləyə kimi hesab açılmadı.

İkinci hissəyə də "Zirə" üstün başladı. Qonaqlar 48-ci dəqiqədə hesabı açmağa yaxın olsa da, Keyta zərbə vurmağa gecikdi. Zaman keçdikcə oyunun istənilən kimi alınmadığını görən məşqçilər dəyişikliklərə əl altdı. "Sabah"da Tellur Boyanı, Nuriyev Da Silvanı, Namik Sebalyosu əvəzlədi. Rəşaf Sadıqov isə Rüstəmi Sərtan, Cibrilanı Gerye ilə dəyişdi. Bundan sonra "Sabah" hücumlarının sayını artırdı. Bir epizodda Mikelsin, digərində Kaşukun zərbəsi qeyri-dəqiq alındı. 66-cı dəqiqədə Nuriyevlə ukraynalı vinger "divar paslaşması" etdi. Amma Kaşuk yenə hücumu dəqiq zərbə ilə tamamlaya bilmədi.

72-ci dəqiqədə "Zirə" hava-su kimi arzuladığı qolu vura bilərdi. Qismətin ötürməsini Rəhim tamamlasa da, Yusif əla reaksiya ilə topun qapıdan keçməsinə imkan vermədi. Dəqiqələr irəlilədikcə gərginlik daha da artırdı. Özü də "Zirə" rəqibin qapısı önündə daha təhlükəli vəziyyətlər yaradırdı. Belə həmlələrin birində Amini rahat keçən Keytanın zərbəsini yenə Yusif dəf etdi. Oyunun sonlarına doğru meydanda açıq futbol izləyirdik. Lakin daha çox "Sabah" hücumlar təşkil edirdi. 86-cı dəqiqədə künc zərbəsindən ötürməni Ba başla qapıya göndərmək istəsə də, dəqiqlik çatmadı. 90-cı dəqiqədə isə Mikels yüzfaizlik imkanı qaçırdı. Almaniyalı futbolçu qapıçı ilə üzbəüz qalmasına baxmayaraq, topu qapıdan keçirə bilmədi. Oyuna əlavə olunan 2-ci dəqiqədə Nuriyevin zərbəsini Qismət qapı xəttindən çıxardı.

Beləliklə, gərgin mübarizə şəraitində keçən qarşılaşmada hesab açılmadı. "Qəbələ" - "Şamaxı" matçı da eyni hesabla başa çatdığından "Zirə" Konfrans Liqasına vəsiqə qazanmaq şansını son tura saxladı.

Gözdən qaçmadı
* "Qartallar" fanklubu matç başlamamış "Rəşad, buraya" şüarını səsləndirdi. “Zirə”nin baş məşqçisi də onların istəyini yerinə yetirərək azarkeşləri salamladı.
* Paytaxt derbisi olsa da, oyunu işıqlandırmağa, sadəcə, "Futbol+" qəzetinin və "Sports.az" saytının əməkdaşı təşrif buyurmuşdu.
* Hiss olunur ki, "Sabah" rəhbərliyi komandanın Konfrans Liqasındakı oyunlarının "Bank Respublika Arena"da keçirilməsi üçün əlindən gələni edir. Çünki stadionun ətrafında və daxilində təmir işlərinin getdiyinin şahidi olduq.
* Oyundan sonra Rəşad Sadıqov əvəzetmədən meydana çıxan futbolçuları məşq etdirdi.

İLKİN SULTANLI