Sumqayıtda keçirilən matçda qeydə alınan nəticə gözlənilməz olmasa da, açığı, bir qədər təəccübləndirdi.

“Kapital Bank Arena”da mövsümün iki uğursuzu – “Sumqayıt”la “Səbail” qarşılaşırdı. İlk hissə meydan sahiblərinin üstünlüyü şəraitində keçdi. Bunun məntiqi nəticəsi kimi qonaqlar fasilə ərəfəsində qapısında qol gördü. 37-ci dəqiqədə Süleymanın qapı önünə asmasını Todoroski dəyərləndirdi.

İkinci hissənin əvvəli də qonaqlar adına yaxşı heç nə vəd etmirdi. “Kimyaçılar” daha kəsərli hücumlar qurur, topa daha çox nəzarət edirdi. Lakin vaxt ötdükcə bəlli oldu ki, Samir Abasovun komandası oyunun “ip”ini əldən verir. Meydan sahibləri əvvəlki dəqiqələrdə olduğu kimi topa “yapışa” bilmir, ardıcıl üç ötürmə verməkdə çətinlik çəkirdi. İkinci yarının oratalarında hər şey 180 dərəcə dəyişdi. Vurğunun təcrübəsinə yaraşmayan səhvindən sonra Lyuyiç qapıçı ilə duelə yollanaraq tarazlığı bətpa etdi. 70-ci dəqiqədə “status-kvo”nu bərapa edən “dənizçilər” 3 dəqiqə sonra hesabda önə çıxmağı da bacardı. Bu dəfə Lyuyiç Manafovun asmasını başla dəqiq tamamladı.

Gözləmək olardı ki, “Sumqayıt” bu dəqiqələrdə heç olmasa, 1 xal üçün irəli atılıb rəqibi cəzalandırmaq yönündə maksimum səy göstərəcək. Ancaq 3 dəqiqəyə qapısında 2 qol görən meydan sahibləri noqdaundan ayıla bilmədi. Əsas vaxtın sonuncu dəqiqəsində Şahin Diniyevin komandası oyunda son nöqtəni qoydu. Bu dəfə meydana əvəzetmədən çıxan Mazurek adını tabloya yazdırdı. Argentinalı az qala künc bayrağının yanından yaxın küncü dəqiq nişan almaqla Aydın Bayramovu məyus etdi. Qələbə sayəsində “dənizçilər” uzun müddətdən sonra son pilləni tərk etdi. "Sumqayıt" isə turnir cədvəlindəki mövqeyini itirməsə də, başının üstündəki “qara buludlar” hələ çəkilməyib.

Gözdən qaçmadı

* Srağagün Sumqayıtda premyer-liqanın alt sıralarında qərarlaşan iki komanda üz-üzə gəlsə də, oyuna maraq yetərincə yüksək idi. Tribunalarda yerini tutan azarkeşlərin yarısı qədər də çöldə qalmışdı.
* Matçı izləyənlər arasında yığmanın məşqçisi Arif Əsədovla yanaşı, AFFA-nın baş katibi Sərxan Hacıyev də var idi.
* Mətbuat konfransına ilk gələn Samir Abasov oldu. Bu zaman “Səbail”in əməkdaşlarından biri arxası Samir bəyə tərəf oturub kompüterdə işləyirdi ki, bu da onun gözündən yayınmadı. “Kimyaçılar”ın çalışdırıcısı mikrafon arxasına keçməmişdən öncə üzünü klubun mətbuat katibi Rəşad Məmmədova tutaraq “bu kimdi, arxası mənə tərəf oturub”, - deyə iradını bildirdi.
* Oyundan əvvəl cari mövsümdə qızlar arasında yüksək liqanın qalibi olan “Sumqayıt”ın futbolçuları klub rəhbərliyi tərəfindən mükafatlandırıldı.

RƏŞAD