“Hücumçularla boğuşmağı sevirəm”
Türkiyədə qış “transfer pəncərəsi” yanvarın 12-dən açıqdı.
“Fənərbaxça” artıq ilk transferini həyata keçirib. Superliqada “Qalatasaray”a uduzmaqla zirvədən 4 xal geri düşən “sarı-lacivərdlilər” baş məşqçi Jorje Jezuşun tələbi ilə müdafiə xəttini gücləndiriblər. İstanbul nəhəngi “Adana Dəmirspor”dan 28 yaşlı mərkəz müdafiəçisi Samet Akaydını heyətinə qatıb. Bu transfer “Fənər”ə 3,7 milyon avroya başa gəlib. “3” nömrəli formanı geyəcək Akaydın ilə “3,5+1” illik müqavilə imzalanılıb. Qısaca qeyd edək ki, 190 sm boya malik olan Akaydın 1994-cü ildə Trabzonda doğulub. Yeniyetməlik dönəmində “İdmanocağı”, “Trabzonspor” və “Boluspor”un akademiyasında top qovan bu futbolçu ilk peşəkar müqaviləsini 2013-də “Arsinspor”la imzalayıb. Ümumiyyətlə, 2021-ə qədər bu futbolçu heç vaxt elitada oynamamışdı. Aşağı liqalarda “Sancaktəpə”, “Şanlıurfaspor” və “Keçiörəngücü”nün şərəfini qoruduqdan sonra Samet 2020-də “Adana Dəmirspor”a keçmişdi. Bu klub da həmin vaxt hələ 1-ci liqada idi və yalnız bir ildən sonra superliqaya yüksəldi. Samet elitada müdafiənin mərkəzində Tayyib Talha Sanuçla birlikdə güclü duet təşkil etməsi ilə diqqəti çəkdi. Təsadüfi deyil ki, Sanuçu bu mövsümün əvvəlində “Beşiktaş” qapdı. Ötən ilin noyabrında ilk dəfə Türkiyə yığmasına dəvət alan və peşəkar karyerası boyunca 163 rəsmi oyunda 19 qol vuran Akaydın ikili mübarizələrdə uğurlu oyunu ilə diqqət çəkir. Bu mövsüm o, ikili mübarizələrin 62 faizindən qalib ayrılıb və bu göstəricidə hamıdan öndədi! “Fənər”də müdafiənin mərkəzində son vaxtlar Sərdar Əzizlə Qustavo Enrikenin inamsız təsir bağışladığını nəzərə alsaq, Akaydının artıq bazar günü “Qaziantep”lə səfər oyununda yeni klubunda debüt edəcəyi istisna olunmur. Onu da bildirək ki, “Adana Dəmirspor” Samet Akaydının əvəzinə heyətə Mərt Çətini cəlb edib. Bu mövsüm icarə əsasında “Leççe”də forma geyən və müqavilə ilə “Verona”ya məxsus olan 26 yaşlı futbolçu ilyarımlıq icarəyə götürülüb.
Müqaviləyə imza atandan sonra jurnalistlərin önünə çıxan Samet Akaydın bunları deyib:
“Belə böyük camiəyə gəldiyim üçün sevincli və həyəcanlıyam. İnşallah, hər iki tərəf üçün də düşərli bir transfer olar. İnadkaram və sona qədər savaşmağı sevirəm. Ona görə də forma uğrunda rəqabət aparmağa hazıram. Pis oynaya bilərəm. Amma pis mübarizə aparmayacağıma zəmanət verirəm. Jezuşla ilk məşqə çıxmadan öncə söhbət etdim. 3 mərkəz müdafiəçili sistemdə oynamağı bacardığım üçün məni transfer ediblər. Topla irəli çıxmaq və arxadan oyun qurmaq bacarığım var. Jezuş da bu özəlliklərimdən xəbərdardı. Həm Türkiyədən, həm də xaricdən çox təklif almışdım. “Adana Dəmirspor” başqanı məndən hara getmək istədiyimi soruşanda “Fənərbaxça”nın adını çəkdim. Bunu fanatlara xoş görünmək və elə-belə söz xətrinə demirəm. Hisslərimlə hərəkət edən insanam və həmin anda da hisslərimi dinlədim. Həm də “Fənərbaxça”nın bu mövsüm çempion olacağına inandığım üçün bu klubu seçdim. Hücumçuları daban-dabana izləməyi, onlarla belə desək, boğuşmağı sevirəm. Meydanın hər yerində mübarizə aparıram. “3” nömrəli formanı məndən öncə Kim-Min Çje geydiyi üçün üzərimdə məsuliyyət bir qədər də artır. Onun yoxluğunu hiss etdirməməyə çalışacam. Uzun illərdi bu nömrə ilə oynadığıma görə “Fənərbaxça”da da bu nömrəni seçdim”.
Digər xəbərlər
