“Araz Naxçıvan” Türkiyə klubunu üstələdi - ÖZƏL AÇIQLAMA
AFFA İcraiyyə Komitəsinin ötən gün keçirilən iclasında 2022/23 mövsümündən etibarən 1-ci divizonda çıxış edəcək yeni klubların adına aydınlıq gəldi.
Bunlar “Araz Naxçıvan”, “İmişli” və “Mingəçevir”di. Qəzetimizin ötən sayında Naxçıvan təmsilçisinin baş məşqçisi Azər Bağırovla bu məsələ ilə bağlı danışmışdıq. O, açıqlamasında “nəinki divizionda, premyer-liqada da mübarizə aparmaq arzusundayıq” demişdi. Artıq hər şey dəqiqləşib və təcrübəli mütəxəssisin komandası növbəti mövsümdən peşəkar klub statusu ilə 1-ci divizionda mübarizə aparacaq. Bu səbəbdən Azər bəylə yenidən əlaqə saxlayıb, fikirlərini öyrənməyi lazım bildik: “Çox sevindim. İnşallah, “Araz Naxçıvan” 1-ci diviozionda sözünü deyər və mübarizəyə rəng qatar. İcraiyyə Komitəsinin bu qərarı bizim üçün çox xoş oldu. Səbirsizliklə belə bir qərarın verilməsini gözləyirdik. Bundan sonra necə addımlayacağımızla bağlı Bakıya qayıdandan sonra plan quracağıq. “Araz Naxçıvan” divizionda öz oyunu və dəst-xətti ilə mütləq seçilməlidi. Gələcəkdə premyer-liqaya vəsiqə qazanmaq üçün bu liqada uğurlu çıxış etməliyik”.
Naxçıvan klubu aprelin 26-dan etibarən hazırlığı Ərzurumda davam etdirir. Komanda artıq ilk yoxlama oyunu da keçirib. “Yakutyaspor”la görüş naxçıvanlıların 4:1 hesablı qələbəsiylə bitib. Ərzurumun "Palan" otelində məşkunlaşan "qırmızı-ağlar" mayın 5-dək daha iki qarşılaşmada gücünü sınayacaq. Növbəti rəqib "TFF Ərzurum yığması" olacaq.
[b]SƏNƏM FƏRHADOVA [/b]
