Bu gün Tofiq Bəhramov adına Respublika stadionunda “Sabah”la “Beşiktaş” arasında qardaşlıq oyunu keçiriləcək.

"Football-plus.az" xəbər verir ki, matç Türkiyənin Hatay bölgəsində baş verən zəlzələdən əziyyət çəkən insanlara yardım məqsədi ilə təşkil olunub. Meydanda yaşananları İTV və “İdman TV” vasitəsiylə canlı izləmək mümkün olacaq.

Qardaşlıq oyunu
13 may
Sabah – Beşiktaş (Türkiyə) 3:3
Aleksey Kaşuk, 4, 5. Davit Volkov - Umut Meraş, 24, 44. Cenk Tosun, 63-p.
Hakimlər: TURAL QURBANOV, Vüsal Məmmədov, Rəhman İmami, İnqilab Məmmədov.
Bakı. Tofiq Bəhramov adına Respublika stadionu. Saat 18.00

Qarşılaşmaya maraq yetərincə böyükdü. Yoldaşlıq xarakteri daşıyan oyuna hər iki komanda ciddi hazırlaşır. “Beşiktaş” hazırlığa iki gün öncədən başlayıb. Mediaya qapalı keçən hazırlıq prosesini klubun prezidenti Əhməd Nur Çəbi, idman direktoru Ceyhun Kazancı da izləyib. Futbolçular baş məşqçi Şenol Günəşin rəhbərliyi altında məşqə isinmə qaçışları ilə start verib. Hazırlıq prosesi ötürmələrin icrası, qapıya dəqiq zərbələrin vurulması və dar sahədə taktiki oyunla başa çatıb. İstanbul təmsilçisi dünən axşam Bakıya gəlib. Komanda Heydər Əliyev Beynəlxalq Hava Limanında böyük coşqu ilə qarşılanıb.

“Sabah” da “Kəpəz”lə səfər matçından sonra “Beşiktaş”la görüşün hazırlığına start vermişdi. Komanda, demək olar ki, tam heyətlə məşq keçir. “Bayquşlar”ın heyətində, yalnız Zurab Oçiqava zədəlidi. Qalan futbolçular “qara qartallar”la görüşdə meydanda ola biləcək.

Komandalar indiyə kimi qarşılaşmayıb. Ümumiyyətlə, bu “Sabah”nın Türkiyə klubları ilə ilk sınağı olacaq. “Beşiktaş” isə iki dəfə Azərbaycan klubu ilə üz-üzə gəlib. İlk görüş 2008-ci ildə “Xəzər Lənkəran”a qarşı keçirilib. İstanbulun "İnönü" stadionunda Oktay Dərəlioğlunun vida görüşü baş tutub. Futbolçu adı çəkilən iki klubda forma geyinmişdi. Qarşılaşma 4:0 hesabı ilə istanbulluların xeyrinə başa çatmışdı. İki dəfə Mərt Nobre, hərəyə bir dəfə İbrahim Toramanla Saim Çəlik fərqlənmişdi.

“Beşiktaş”ın növbəti sınağı isə “Neftçi”yə qarşı olub. Komandalar 2010-ci ildə Avstriyanın Tirol əyalətində yoxlama görüşündə qarşılaşıb. Hesabı 24-cü dəqiqədə "Neftçi" açıb. Cərimə zərbəsindən ötürülən topu iki futbolçumuz ayaqları arasından buraxandan sonra Ruslan Abışov dəqiq zərbəylə Rüştünü məyus edib. "Beşiktaş" yalnız son dəqiqələrdə Ərkan Kaşın qolu sayəsində məğlubiyyətdən yaxa qurtarıb.