Çempionat sona yaxınlaşdıqca premyer-liqada gərginlik son həddə çatır.

Xüsusilə ikinci “beşlik”də qərarlaşan komandaların iştirakı ilə keçirilən oyunlar hakimlik baxımından daha çətin olur. Elə ədalət təmsilçiləri var ki, status baxımından “ağır” qarşılaşmalarda özünü itirmir, düzgün qərarlarla həm azarkeşlərin, həm də rəqiblərin alqışını qazanır. Ancaq elələri də var ki, kobud səhvlərlə yadda qalır. 33-cü tur da bu yöndə istisna olmadı. Reportyorlarımızın qeydlərinə keçid alaq.

Şamaxı – Zirə, CAVİD CƏLİLOV
Oyunun gərgin keçəcəyi gözlənilirdi. Bu üzdən hakimlər briqadasının işinin öhdəsindən necə gələcəyi maraqlı idi. Təəssüf ki, nə oyun gərgin keçdi, nə də ədalət təmsilçiləri çətinə düşdü. 90 dəqiqə ərzində referinin yekun nəticəyə təsir edən qərarları olmadı. Baş hakim sərt mübarizələrə imkan verir, hər xırda qayda pozuntusuna görə firtini səsləndirmirdi. Bir sözlə, oyun yetərincə intizamlı keçdi. Referi cəmi üç dəfə əlini cibinə atdı ki, göstərilən vərəqələrin hər biri yerində idi. Rəşad Sadıqov əksər oyunlarda hakimlərə müxalifliyi ilə diqqəti çəksə də, bu matçda polemikaya girmədi. Bu da onun göstəricisidi ki, referi oyunda ədaləti, obyektivliyi tam qorudu.

Qarabağ – Qəbələ, RƏVAN HƏMZƏZADƏ
Artıq 1-ci dəqiqədə İsnik Aliminin Marko Yankoviçə qarşı kobudluğu göstərdi ki, hakimi rahat idarəçilik gözləmir. Qarşılaşma hakim səhvləri ilə yadda qaldı. 36-cı dəqiqədə Julio Romao İsnikin ayağına müdaxilə etsə də, referi braziliyalıya sarı vərəqə göstərmədi. İkinci yarıda isə Kevin Medina Alimiyə qarşı eyni qayda pozuntusuna yol versə də, yenə cəzasız qaldı. 56-cı dəqiqədə Ramil Şeydayevlə Emin Mahmudov top uğrunda mübarizə apararkən hücumçu kobudluğa yol verdi. Amma hakim qayda pozuntusu qeydə almadı. Ədalət təmsilçisiylə bağlı diqqətçəkən məqamlardan biri də ilk hissədə topun iki dəfə ona dəyməsi oldu. Görünür, Rəvan Həmzəzadə meydanda mövqe seçimi etməkdə çətinlik çəkir, bu üzdən metodik səhvə yol verir.

Kəpəz - Sabah, RƏŞAD ƏHMƏDOV
İlk yarı referi üçün asan keçdi. Onsuz da ilk 30-35 dəqiqədə, demək olar, meydanda ancaq “Sabah” var idi. “Sarı-göylər” rəqibə müqavimət göstərə bilmirdi. Fasilədən sonra isə vəziyyət dəyişdi. “Kəpəz” sıxışdırır, “Sabah” müdafiə olunurdu. Belə epizodların birində hakimlər briqadası səhvə yol verdi. 53-cü dəqiqədə Xvalkoya dəyən top qapı xəttindən keçsə də, nə əsas hakim, nə köməkçiləri, nə də VAR-dakılar bunu gördü. Rəşad Əhmədovun başqa hansısa kobud səhvi olmadı. Lakin bu epizod nəticəyə təsir etdi.

Turan Tovuz – Neftçi, KAMAL UMUDLU
Qarşılaşmanın hakimliyi haqda çox danışmağa ehtiyac yoxdu. Tovuzlular flaqmanı elə məngənəyə salmışdı ki, referiyə o qədər də ehtiyac duyulmadı. Sadəcə, qollar zamanı hakimlər VAR-a çox baxdı. Buna da həddən artıq vaxt gedirdi. Ümumilikdə isə Kamal Umudlu görüşü ideala yaxın idarə etdi.

Sumqayit- Səbail, İNQİLAB MƏMMƏDOV
Cari mövsümdə həm Samir Abasov, həm də Şahin Diniyev dəfələrlə hakimlikdən narazı qalıb. Xüsusilə Şahin bəy ədalət təmsilçilərinin komandasına münasibətdə ikili standartlara söykəndiyini bildirib. Ancaq Sumqayıtdakı matçdan sonra nə qalib, nə də məğlub komandanın çalışdırıcısı hakimliklə bağlı irad bildirdi. Bu da o deməkdi ki, matçın baş hakimi kobud səhvə yol verməyib.

"Football-plus.az"