"Şamaxı" ilə görüşdə "Zirə"nin heyətində 90 dəqiqə meydanda olanlardan biri də Coşqun Diniyev idi.

"91 nömrə" özünü yaxşı tərəfdən göstərənlərdən idi. Milli üzvü ilə oyun və başqa möpvzular haqda danışdıq.

- Matçla bağlı fikirlərin maraqlıdı...
- Oyunun çətin keçəcəyini bilirdik. "Turan Tovuz"a məğlubiyyətdən sonra üzərimizdə böyük təzyiq vardı. Avrokubok şansımızı azaltmışdıq. Ona görə psixoloji cəhətdən toparlanmalı, "Şamaxı"nı üstələməliydik ki, buna da nail olduq. Qarşıdakı matçlarda da bu uğurumuzu davam etdirməklə yanaşı, "Qəbələ"nin xal itirəcəyini gözləyəcəyik.

- "Qəbələ"nin sizi üstələyərək 4-cü pillədə qərarlaşmasında özünü və komanda yoldaşlarını günahkar sayırsan?
- Hər bir komandanın uğursuzluğunda futbolçuların zəif çıxışı, günahı olur. Yol verdiyimiz səhvlər "Qəbələ"nin bizi üstələməsi və avrokubok mübarizəsində geri düşməyimiz ilə nəticələnib. Amma dünyanın sonu deyil. Sonadək əzmlə mübarizə aparacağıq ki, itirdiyimiz 4-cü pilləni geri qaytaraq. Buna nail ola bilməsək, səhvlərimizi ciddi təhlil edərək dərs çıxarıb, növbəti ölkə çempionatında daha yaxşı çıxış edəcəyik.

- Səncə, bu il çempionatın səviyyəsi yüksəlib?
- Düşünürəm ki, hər mövsümün ağırlığı, çətinliyi, marağı olub. Amma bu il digərləriylə müqayisədə daha rəqabətlidi. Komandaların sayının artması çempionata rəng qatıb.

- Necə düşünürsən, 10 komandalı çempionatı qorumalıyıq, yoxsa bu sayı 12-yə çatdırmalıyıq?
- Bu mövsüm Tovuz və Gəncə təmsilçilərinin elitaya yüksəlməsi çempionata rəng qatdı. Məncə, növbəti mövsümdən 12 komanda yer alsa, daha maraqlı və rəqabətli çempionat izləyəcəyik.

- İkinci "5-lik" təmsilçilərindən hansının çıxışı xoşuna gəlir?
- Aşağı-yuxarı bütün komandalar eyni üslubda oynayır. Əsas məqsədləri də sonuncu olmamaq üçün döyüşməkdi. Ona görə hansısa klubu fərqləndirməzdim.

- Atanın baş məşqçisi olduğu "Səbail" elitada qalmaq uğrunda çarpışır. Komanda 1-ci diviziona düşsə, sənə necə təsir edəcək?
- Futbolçu kimi cavab versəm, "Zirə"nin üzvüyəm və bütün fikirimi bu yöndə fokuslayıb komandama maksimum faydalı olmağa çalışıram. "Səbail"ə də rəqiblərimizdən biri kimi yanaşıram. Amma övlad kimi məsələyə yanaşsam, atamın çalışdırdığı komandanın uğursuzluğa düçar olmasını istəmərəm. "Səbail"in elitada qalması öz əlindədi. Qarşıda hələ 3 tur var, "Şamaxı" da bu gün xal itirdi. İnanıram ki, "dənizçilər" qarşıya qoyduğu məqsədə çatacaq.

- Yığmamız AÇ-2024-ün seçmə mərhələsinə uğursuz start verdi. Səncə, belə başlanğıcın səbəbi nədi?
- Uğursuzluğun səbəbi barədə komandanın baş məşqçisi və AFFA fikir bildirsə, yaxşı olar. Millinin formasını geyinən biri kimi ölkənin əsas komandasının daha yaxşı nəticələr göstərməsini arzulayıram. Bunun üçün əlimdən gələni də etməyə hazıram.

- Bundan sonra yığmadan nə gözləyək?
- İki oyundakı acı məğlubiyyətdən dərs çıxarmalı və qarşımıza daha yaxşı çıxış etməyi məqsəd qoymalıyıq. Maksimum rəqiblərə başağrı olmaqla xallar toplayıb irəli getməli, qrup sonuncu olmamaq üçün çarpışmalıyıq.

ABDULLA İSMAYILOĞLU