Mayın 6-da Şamaxı şəhərində “Şamaxı”nın strategiyasının hazırlanması ilə bağlı seminar keçirilib.

Futbolun İnkişaf Fondunun Himayəçilər Şurasının üzvü, “Azercell Telecom”un Korporativ Ünsiyyət Departamentinin rəhbəri Sona Abbasovanın mentorluğu ilə baş tutan tədbirdə fondun və “Şamaxı”nın nümayəndələri iştirak edib. Strategiyanın önəmi və əsas komponentləri barədə geniş təqdimat edilib, həmçinin klub nümayəndələri ilə birlikdə “Şamaxı”nın strategiyasının hazırlanması üzərində işlər aparılıb. Görüşlə bağlı ətraflı məlumat almaq üçün FİF-in direktoru Tural Piriyevlə əlaqə saxladıq.

- Öncə tədbirlə bağlı fikirlərinizi bilmək maraqlı olardı...
- "Şamaxı"nın strategiyası ilə bağlı daha öncə görüşlərimiz olmuşdu. Effektli və həqiqətən faydalı strategiya yazılması üçün klubun rəhbərliyinin, strateji sahələrə cavabdeh əməkdaşlarının iştirakının vacibliyini nəzərə alaraq bu seminar təşkil edildi. Tədbirin ilk hissəsi ümumi məlumatların verilməsi, ikinci hissəsi isə qrup çalışması əsasında strategiyanın yazılmasından ibarət idi. Öz müşahidəmə və klub nümayəndələrinin qeydlərinə əsasən deyə bilərəm ki, çox faydalı tədbir oldu. Strategiyanın yazılması ilə bağlı növbəti tədbir "Araz Naxçıvan"la olacaq. Hazırda region üzrə sorğu tamamlanmaq üzrədi.

- Görüşdə "Azercell Telekom"un Korporativ Ünsiyyət Departamentinin rəhbəri Sona Abbasova mentorluq edib. Yaxın zamanda bu şirkətlə klub arasında əməkdaşlıq gözlənilir? Sona xanımın mentorluğunun səbəbi nə idi?
- Sona xanım FİF-in Himayəçilər Şurasının da üzvüdü. Bu sahədə zəngin təcrübəsinin olduğunu, bir çox şirkətlərin strategiyalarının yazılmasında iştirakını nəzərə alaraq özünün təşəbbüsü ilə bu görüşdə iştirak edirdi. Onunla yanaşı, idman sponsorluğunda zəngin təcrübəsi olan, hazırda fərqli bir qurumda çalışan Rauf Cahangirov da tədbirə fayda qatması üçün dəvət olunmuşdu.

- Bu tur "Şamaxı" son pilləyə yuvarlandı. Komandanın çempionatı tərk etmək ehtimalı var. Bu, FİF-in klubla bağlı planlarına mane olmayacaq?
- FİF premyer-liqa və birinci divizionda mübarizə aparan bütün region klubları ilə əməkdaşlıq etməyi, bacardığı qədər onlara dəstək olmağı qarşısına məqsəd qoyub.

- Deyilənə görə, FİF artıq həm "Şamaxı", həm də "Kəpəz" üçün yeni sponsor tapıb. Bu səbəbdən də AFFA premyer-liqada klubların sayını artırmaq niyyətindədi...
- Sponsorun cəlb olunması vaxt aparan prosesdi və imzalar atılana qədər fikir bildirmək düzgün deyil.

- "Turan Tovuz"a sizin sayənizdə sponsor tapıldı. "Huner Group" həqiqətən də qərb təmsilçisi üçün əla işlər görür. Ümumiyyətlə, Azərbaycan futbolunda klublar həmişə bir şirkətdən asılı olub. Bunun yaratdığı problemləri isə hamımız bilirik. İndi də bu sistemin davam etdiyi görünür. 1 şirkət - 1 klub layihəsinin mənfi tərəfləri sizi qorxutmur?
- Maliyyə diversifikasiyası dayanıqlı klub formalaşdırmaq üçün vacibdi. "Turan Tovuz"a bir şirkətdən asılı klub demək olmaz, çünki hazırda maliyyə faktiki iki mənbədən gəlir - dövlət proqramı vasitəsilə və baş sponsordan. Çox sevindirici haldı ki, dayanıqlı klub formalaşdırmaqla bağlı həm "Turan Tovuz", həm də "Huner Group" ilə yanaşmamız eynidi. Hazırda onlar oyun günü gəlirlərinin artırılması, yeni sponsorların cəlb olunması, alternativ maliyyə mənbələrinin aşkarlanması kimi sahələr üzərində çalışır. İnanıram ki, bu gedişlə Tovuzda yaxın zamanlarda çox gözəl bir dayanıqlı klub nümunəsi görəcəyik.

- "Turan Tovuz"un avtobusunun üzərində piksellər nə zaman öz əksini tapacaq?
- Tezliklə. Yubanma texniki işlərlə əlaqədardı.

- Mediada FİF-in işini tərəfləyənlər də var, sərt şəkildə tənqid edənlər də var. Bu sizə təsir edir?
- Birmənalı şəkildə müsbət təsir edir. Fəaliyyətimizi işıqlandıran hər kəsə təşəkkür edirik.

İLKİN SULTANLI