Premyer-Liqanın Şöhrət Zalının üzvlərinin sayı artıb. İngiltərə yığmasının sabiq futbolçusu Rio Ferdinand da bu zala daxil edilib.

“Football-plus.az” xəbər verir ki, liqanın saytının məlumatında 44 yaşlı keçmiş müdafiəçinin azarkeşlər arasında keçirilən səsvermədən və ekspertlərin rəyindən sonra bu şərəfə layiq görüldüyü bildirilib. Ümumilikdə 15 sabiq futbolçu Şöhrət Zalına namizəd olub. 2023-cü ildə bu zala daxil edilən ilk şəxslərin Aleks Ferqyusonla Arsen Venger olduğunu bildirək. Premyer-Liqanın Şöhrət Zalı 2021-ci ildə təsis edilib. Bu məkana Alan Şirer, Tyerri Anri, Erik Kantona, Roy Kin, Frenk Lempard, Dennis Berqkamp, ​​Stiven Cerrard, Devid Bekem, Pol Skoulz, Didye Droqba, Vensan Kompani, Serxio Aquero, Patrik Vieyra, Ueyn Runi, Yan Rayt və Peter Şmeyhel də layiq görülüb.

Xatırladaq ki, Ferdinand “Vest Hem”, “Bornmut”, “Lids”, “Mançester Yunayted” və “Kuinz Park Reyncers”də də çıxış edib. MY ilə 6 dəfə premyer-liqanın, 4 dəfə İngiltərə Superkubokunun, 2 dəfə İngiltərə Liqa kubokunun, həmçinin bir dəfə Çempionlar Liqası və Klublararası Dünya Çempionatının qalibi olub. Ferdinandın İngiltərə yığmasının formasında 81 oyuna 3 qol vurduğunu da bildirək.