İngiltərədə daha iki sabiq futbolçu premyer-liqanın “Şöhrət zalı”na daxil edilib.

Bununla da belə şərəfə layiq bilinənlərin sayı 10-a çatıb.

“Şöhrət zalı”na layiq görülən son iki futbol adamı Ueyn Runi ilə Patrik Vieyradı. Runi futbolçu karyerasının çox hissəsini “Everton”da və “Mançester Yunayted”də keçirib. Sabiq hücumçu MY ilə 5 dəfə ölkə çempionu olub. O, premyer-liqada 208 qol vurmaqla turnirin ən yaxşı 2-ci bombardiridi. Vieyra isə İngiltərədə “Arsenal”ın və “Mançester Siti”nin formasını geyib. Sabiq fransalı yarımmüdafiəçi paytaxt klubu ilə 3 dəfə çempion olub.

Qeyd edək ki, MY-dən “Şöhrət zalı”na Devid Bekhem, Erik Kantona və Roy Kin, “Arsenal”dan isə Dennis Berqkamp ilə Tyerri Anri də layiq görülüb. Bu zala Alan Şirer, Frenk Lempard və Stiven Cerrard da düşə bilib.