Mayın ilk günündə UEFA prezidenti Aleksander Çeferin Yunanıstan Futbol Federasiyasına xəbərdarlıq məktubu göndərib.

"Football-plus.az"ın məlumatına görə, məktubda deyilir ki, bundan sonra UEFA-nın elit və A kateqoriyalı hakimləri Yunanıstan çempionatında oyun idarə edə bilməz. Bu qərarı şərtləndirən səbəb yunanların polşalı Pavel Raçkovski və italiyalı Davide Massaya münasibətdə yol verdiyi hərəkətlərdi.

Belə ki, Raçkovskinin rəhbərlik etdiyi polşalı hakimlər briqadası alkoqol qəbulu iddiası ilə son anda AEK – “Aris” oyununun idarəçiliyindən kənarlaşdırılıb, onları yunan hakimlər əvəz edib.

Bildiyiniz kimi, həmyerlimiz Əliyar Ağayev də son illərdə dəfələrlə Yunanıstan çempionatının oyunlarına təyinat alıb. “Aris” superliqanın 33-cü turunda PAOK-la keçirilən oyundan sonra bəyanat yayaraq hakim idarəçiliyindən şikayətçi olub. Bəyanatda Əliyar Ağayev saxtakarlıqla itttiham olunub. Klubun iddiasına görə, FİFA referisi “Aris”in yüzfaizlik penaltisini və rəqibin müdafiəçisinə qırmızı vərəqəni verməyib.

Qeyd edək ki, Əliyar Ağayev 2016-cı ildə UEFA-nın A kateqoriyasına keçməklə Çempionlar Liqasında qrup və pley-off oyunlarına təyinat almaq hüququ qazanıb.

KƏNAN BAHADIR