“Bavariya”nı sanki Naqelsmannın ahı tutub.

Rəhbərlik, yəqin ki, məşqçi dəyişikliyinə getdiyi üçün artıq peşmandı. Çünki Tuxelin təyinatından bəri komanda yerində saymaq bir yana, hətta geriyə gedir. İnkişafdan isə danışmaq, ümumiyyətlə, mümkün deyil. “Rekordmayster” bu tur Maynts səfərində fasiləyə öndə yollansa da, 2-ci hissədə 14 dəqiqə aralığında 3 top buraxaraq həm fanatlarını, həm də futbol ictimaiyyətini şoka saldı! Tuxelin yersiz rotasiyası da bu uğursuzluqda az rol oynamadı. Komanda rəsmi matçlarda ardıcıl 4-cü oyunda qələbəyə həsrət qaldı ki, sonuncu dəfə belə hal 2018-in oktyabrında yaşanmışdı. “Borussiya” ötən turdan fərqli bu dəfə “hədiyyəni” məmnunluqla qəbul etdi və “Ayntraxt”ı darmadağın edərək zirvəyə yüksəldi. Maraq üçün bildirək ki, “Borussiya”nın sonuncu dəfə 29-cu turu zirvədə başa vurmasına 2011/12-də, yəni komandanın son dəfə çempion olduğu mövsümdə rast gəlinmişdi. “Arılar” həm də bundesliqada evdə ardıcıl 9-cu qələbəni bayram etdilər. Bu, bir mövsümün gedişi üçün komandanın yeni rekorudu!

Digər oyunlara gəlincə, iddialı “Leyptsiq”i yenərək yüksəlişini davam etdirən “Bayer-04” “ÇL zonası” ilə xal fərqini 6-yə endirdi. Büdcəsini və imkanlarını nəzərə aldıqda nağıllardakı kimi bir mövsüm keçirən “Union” Münhanqladbaxdan da qələbə ilə qayıtmağı bacardi. Komanda mövsümdə 16-cı qələbəsini qazanmaqla və səfərdəki xallarını 23-ə çatdırmaqla şəxsi rekordlarını yenilədi. “Frayburq” sevimli rəqiblərindən olan “Şalke-04”ü yenə “kötəkləyərək” 4-cü pilləyə qayıtdı. “Şalke-04” adının qarşısındakı rəqəmə uyğun olaraq ardıcıl 3-cü dəfə səfərdə bu rəqibə 0:4 hesabıyla uduzdu! “Volfsburq”, “Köln” və “Verder” gözlənilmədən turu asan səfər qələbələri ilə başa vurdular.

Turun rəqəmi
3 – 2021-in yanvarından “Mayns-05”i çalışdıran Bo Svensson sanki “Bavariya”ya qənim kəsilib. “Karnavalçılar” danimarkalı mütəxəssisin təyinatından bəri ardıcıl 3-cü mövsüm Münhen nəhəngini evə əliboş yola saldılar! 2020/21-də 2:1, 2021/22-də yenə də 3:1-lik qələbələr qeydə alınmışdı. Bununla da Svensson 27 ildən sonra bir ilkə imza atdı. Belə ki, sonuncu dəfə baş məşqçi kimi bundesliqada “Bavariya”ya qarşı ilk 3 ev oyunundan qələbə ilə ayrılan mütəxəssis 1993-96-cı illərdə “Frayburq”un başında Folqer Finke olmuşdu. Svensson həm də 7 il (2007-14) futbolçu kimi “Maynts-05”in şərəfini qoruyub və həmin dönəmdə də “rekordmayster” üzərində 3 qələbəyə sevinib. Başqa sözlə desək, “Maynts-05”in tarixi ərzində “Bavariya”ya qarşı qazandığı 7 qələbədən 6-da Svensson iştirak edib!

Turun ulduzu
Marvin Dukş (Verder) – Levadnovski ilə Holannın ayrılmasından sonra bundesliqada het-triklərin sayı əhəmiyyətli dərəcədə azalıb. Dukş bu mövsüm çempionatdakı cəmi 4-cü het-trikin müəllifi oldu. Müqayisə üçün deyək ki, bundesliqada 2020/21-də 14, ötən mövsüm isə 8 het-trik qeydə alınmışdı. Dortmund “Borussiya”sının yetirməsi olan və 2021-dən bremenlilərin şərəfini qoruyan 29 yaşlı Dukş 60-cı bundesliqa oyununda ilk dəfə bu sevinci yaşadı. “Verder”in heyətində elitada sonuncu dəfə 1 oyunda 3 qol vuran futbolçu 2020-nin sentyabrında Füllkruq olmuşdu.